قمت الصبح.
فتحت جوالي
"صباح الخير ❤️ "
رديت "صباح النور"
"وصلني خبر ان الشركة بتنور اليوم؟"
"لول بتنور ايه"
"وشلونك؟"
"الحمدلله"
"متى بتجين؟"
"اتحمم و ابدل و افطر؟"
"كم يبيلهم؟"
"ساعة؟ و شوي يمكن؟"
"اح شدعوة عروس؟"
"ايه عروس؟ موب عاجبك؟"
"لا لا عاجبني عاجبني، اذا طلعتي قوليلي يا حلوة ❤️ "
كيوت.
" ان شاءلله ❤️ "
بدلت و نزلت افطر مع ابوي.
"اليوم اول يوم بداوم"
-"تداومين وين"
"بالشركة اللي قلتلك عنها.."
-"يعني مصره؟"
"يبا والله اسبوعين بس"
-"اعرفك انا تعلميني فيك؟ اذا جازلك الشغل بتتركين دراستك و تشتغلين، نفس ماسويتي بامريكا بالضبط"
"لا امريكا فرق، تركتها لانها بعيده، بس لاتخاف منيب تاركة دراستي لو وشو"
-"وعد؟"
"وعد، يلا انا لازم اروح مابي اتأخر اول يوم"
-"مضاوي يبا، لاتنتظروني على الغدا اليوم، مسافر يومين ان شاءلله و راجع"
"مسافر؟ متى"
-"اليوم"
"ليش دايم تقولي اخر لحظة يبا الله يهديك، كان قلتلي من امس اسويلك شنطتك"
-"ماله داعي وش يبيلها شنطتي ما يبيلها شي"
"طيب، تبي اوصلك المطار؟"
-"لا ماله داعي، انتي روحي ركزي بشغلك ولاتنسين اللي وعدتيني به"
.
طلعت و ارسلت مسج لبدر.
"بالطريق انا"
"افرشلك اياه ورد يعني ولا وشو؟"
"وجع انت قايلي علميني اذا طلعتي"
"صدق؟"
"اطلع فوق و شوف."
"طيب نمزح تعالي"
"بركز بسواقتي ماقدر احاكيك"
"طيب ركزي ركزي"
مارديت.
يقهر وشو افرش لك اياه ورد؟
انت اللي قايل لي!
وصلت الشركة و رحت للحرمة حقت امس.
"صباح الخير"
سمر: "صباح النور هلا،"
ابتسمت: "بتعلميني وش اسوي ولا اروح كذا ابدا؟"
سمر: "لا الاستاذ بدر بيعلمك روحي مكتبك وانا الحين بعطيه خبر انك وصلتي"
"اوه.. طيب اوكي.."
رحت المكتب انتظر .
تغير مره عن امس.
الغبار كله راح
المكتب نظيف يلمع.
قعدت اناظر المكتب حولي.
رف الكتب اللي بطول الجدار.
رحت اناظر الكتب .
--"صباح الخيير!!"
التفت: "بسم الله!"
-"خفتي؟"
"ماخفت بس مو مفروض تطق الباب؟ تخيل كنت موب لابسة مثلا"
ضحك- "الظاهر ملخبطة بيني و بين خواتك بالبيت وش اللي موب لابسة؟ بعدين. فيه كاميرا بالمكتب حطيها في بالك اذا فكرتي انك ماتكونين لابسة "
"لاتسوي مدير عليّ"
-"وانا وشو طيب"
"مدير عليهم بس موب عليّ"
-"ايه اها طيب،"
"وش مفروض اسوي"
-"بعطيك شغل بسيط، خذي هذا جدول مواعيدي اذا احد جا يبي يشوفني او شي رتبي معه على حسب الجدول، و ايه صح اتركي نص ساعة بريك بين كل ساعتين"
"واو. اقعد ارتب لك مواعيدك؟ هذا شغل؟"
-"وش تبين تسوين طيب؟ عطيتك اسهل شي؟"
"ابي شغل صدقي موب شغل سكرتيره"
-"موب مفروض انك سكرتيره؟ بعدين انتي قلتيلي ماتبين شغل كبير صح؟ كنتي تبين صبابة القهوة تذكرين؟"
"بايخ"
-"تبين تحضرين اجتماع طيب؟"
سكت.
-"تبين؟ يلا يلا تعالي،"
ومسكني من ايدي و اخذني لقاعة الاجتماعات.
طق الباب.
بدر: "اعذروني على التأخير، بس كنت اشرح لشغل لمساعدتي الجديدة، اعرفكم مضاوي ال*"
اوكي بدر . وش هالهبال اللي تسويه.
طاوله طويله كلها ناس.
وناس معصبين بعد.
انه وجيههم جدية مره ما يبتسمون.
بدر: "تفضلي اقعدي"
قعد بدر و قعدت بالكرسي اللي بجمبه.
و كملو اجتماعهم.
احاول افهم شي بالاجتماع عجزت.
ويني انا ووين البزنس و هالحكي.
التفت على بدر.
لقيته ماسك جواله.
اخذت ورق قدامي و حطيته فوق جواله.
ناظرني.
قال و هو يهمس: "خير ان شاءالله؟"
همست له-"بس اترك جوالك"
: "شوفي جوالك"
طلعت جوالي من الشنطة.
لقيته مصورني وانا متنحه.
ارسلت له: "زق انت؟"
-"والله وجهك رايح فيها، تبين نطلع؟ عادي ترا"
"يعنني مدير و محد قدي"
-"ايه مدير و محد قدي . "
"هذا وانت مفروض القدوة اللي كلهم يسمعون كلامك"
-"غصبن عليهم"
"ليه ماسك جوالك؟ مفروض اكثر واحد مركز"
-"تنكرين انه زهق؟"
"زهق لاني موب فاهمة، بس انت هذا شغلك . انا موب دارسة بزنس"
-"ولا انا موب دارس بزنس"
"وش دارس اجل؟"
-"قومي خننطلع"
"لا. مابعد خلص الاجتماع"
-"قومي اجتماع جدتي"
سكرت جوالي و حطيته بالشنطة.
ناظرت بدر انه خلاص.
و التفت اناظر اللي يحكي.
فجأة بدر رمى جواله على الطاولة.
كلهم ناظروه.
قعد خمس دقايق و عقبه طلع من الغرفة يقاله معصب.
كملت معهم وانا موب فاهمه ولا كلمة.
يوم خلصو وحدة جالسة قدامي كانت تسولف معي.
تسألني عن جامعتي و كذا..
جا بدر من وراي،
-"خلص الاجتماع ممكن تقومين على شغلك؟"
التفت. "الحين بقوم" و رجعت اسولف مع البنت.
مسكني بدر مع كتفي و قال للحرمة: "عن اذنك، بس وراها شغل، لسا قدامك اسبوعين تتعرفين عليها"
و قومني من الكرسي.
دخلنا مكتبي.
"وش اللي سويته صاحي انت!"
بدر: "اجتماعك خلص و وراك شغل"
"استاذ بدر لو سمحت. صدق خلاص"
بدر: "استاذ بعد؟ حلو حلو. "
"وش تبي مني بالضبط! موب جاية اشتغل عندك تراي! اروح بكيفك و اجي بكيفك!"
بدر: "ماقلتلك تشتغلين عندي! بس قلتلك اني ماحب احد يسفهني"
"تسولف معي بنص الاجتماع تقولي نطلع! فوق ما حنا داخلين متأخر و مقاطعينهم و ماسك جوالك طول الاجتماع تبي تطلع فجأة؟"
بدر: "فاهمة شي من الاجتماع انتي!؟"
"موب فاهمة و موب لازم افهم! بس فيه شي اسمه احترام! فيه شي اسمه انا جاية هنا اشتغل! موب اسولف كانها شركة ابوي!"
بدر: "والله؟ طيب. انتي الحين مساعدتي صح؟ ابي الجدول اللي عطيتك اياه يكون جاهز في مكتبي خلال نص ساعة"
"لحظة لحظة وش اسوي فيه ماقلتلي"
بدر: "موب انتي مُخلصة بشغلك؟ المفروض انك تعرفين؟"
"شلون اعرف وانا محد علمني!"
بدر: "احتراماً لمديرك تتعلمين من دون ما يقولك"
" وشلون اتعلم! "
بدر: "نص ساعة ، وحدة و نص يكون بمكتبي جاهز."
و طلع.
سخيف! يا اسمع كلامك يا تسوي كذا!
طلعت ادور سمر تشرحلي.
-"سمر ممكن دقيقة"
كان عندها ناس .
سمر: "شوي مضاوي،"
وقفت انتظرها.
ناظرتني انه روحي.
طلعت انتظرها برا.
شفت ناس واجد ينتظرون يدخلون عندها.
وش هالحظ؟
انتظرت يمكن ربع ساعة انتظر تطلع لي سمر!
مابقى وقت!
دخلت مكتبها مره ثانية: "سمر ممكن لحظة بس ضروري"
سمر: "لحظة اختي، نعم مضاوي وش عندك؟"
"وشلون اسوي هذا" و وريتها الجدول اللي معي.
سمر ابتسمت: "وقته يعني؟ ما قالك الاستاذ بدر؟"
"لا"
سمر: "طيب اسألي مكتب السكرتير حقه"
و كملت تحكي مع اللي معها.
اف اف اف.
قعدت احوس ادور المكتب.
*المكتب المساعد للمدير العام*
من قربت منه سمعت صراخ.
صراخ بدر من غيره يحس المكان شركة ابوه ...
يصارخ عليهم و يهاوشهم..
وقفت برا انتظر.
بعد شوي طلع بدر.
ناظرني و هو عاقد حواجبه.
ماتكلم ولا كلمة و راح.
سمعتهم يسبون بدر و يتحلطمون منه و من صراخه.
دخلت للمكتب.
"اححم.."
كلهم سفهوني الا واحد.
رفع راسه و ناظرني.
"لو سمحت ممكن اسألك ع-"
-"موب فاضي" و نزل راسه و كمل شغله.
وجع.
طلعت و رحت مكتبي.
اللي يصير يصير خلاص.
خل يعصب كيفه.
ماعلمني وشلون اسويه وش دخلني!
قعدت بالمكتب اناظر الجدول اللي عطاني اياه.
صورته و ارسلته لاسما واتساب.
"اسما الحقي عليّ، تعرفين وشلون يتسوى هذا؟"
رحت شفت كم الساعة عندهم لقيتها ٣ الفجر.
مستحيل اسما ترد.
قعدت اناظره..
فجأة دق التليفون اللي على المكتب.
روعني اول مره انتبه له.
رفعت السماعة.
-"اا-الو؟"
"كذا الواحد يرد؟ ماتعرفين تقولين اسم الشركة؟"
-"بدر؟"
"انتظر الورق الحين في مكتبي استاذة مضاوي"
و سكر.
قمت و رحت لمكتبه.
حطيت الورق على الطاوله بقوة.
"ماسويته."
بدر: "امم.. وليه ان شاءالله؟ وين الاخلاص اللي تحكين عنه؟"
"اخلاص لما تعلمني وشلون اسويه! رحت اسأل احد يعلمني اعوذ بالله كل الشركة معصبة! و مكتب المدري وشو حقك مهاوشهم حضرتك و ماسح فيهم الارض! ادري انك متقصد تسوي كذا علشان يعصبون عليّ و مايساعدوني!"
بدر: "واو، موظفة تنطرد بأول يوم دوام لها، حلو صح؟"
"ميتة عليك انا؟ اطردني انت و شركتك الخايسة! المبنى كله شركات ماجت عليك!"
بدر: "اقدر ادق عليهم اقولهم اني طردتك. صدقيني عشرين سنة قدام محد يوظفك عنده"
"عادي عساني ماتوظفت!"
بدر: "و استاذتك؟"
"مالك شغل! صدق انك بزر عقلك صغير! يعني يا اسمع كلامك و اصير مستهتره يا تطردني! اطردني اصلاً لو ماطردتني كنت انا بطلع! انت و شركتك الخايسة"
بدر: "تصيرين مستهتره وتاخذين A+ "
"لاشكراً، اقدر اجيبها بتعبي"
بدر: "خبله والله، الحين فيه احد مايبي راحته؟"
"ما اشتري راحتي الدنيوية على راحة الآخرة، بكره لما الله يسألني عن ال A+ هذي الي اخذتها و انا كذابة ما اشتغلت ولا شي وش اقول؟ صدقني ارسب بالمادة و لا اسويها"
سكت.
"يلا انتظر تطردني.. "
تنهد: "انا هنا اسم بس.. بس اسم اني المدير اللي داير كل الشغل، وانا ماعندي ماعند جدتي ولاني فاهم حرف "
سكت.
بدر: "بس لازم اكون هنا.. صورة يحطونها.."
سكت.
بدر: "صقر هو اللي يدير الشركة صدق "
"اللي انا في مكتبه؟ صح؟"
بدر: "ايه"
"هو نفسه اللي شفته يوم بطاقتي "
بدر: "ايه ايه هو هذا"
"طيب ليش؟ يعني ليش ماهو يصير المدير هنا و انت تروح تسوي شي تعرفله"
بدر: "سالفة طويلة و قديمة.."
"كم صارلك كذا؟"
بدر: "يوه.. من عمري ٢٠"
"قاعد تضيع سنين من عمرك كذا"
بدر: "ماعندي خيار غيره.."
"انت وش دارس بالصدق؟"
ابتسم: "دخلت العسكرية.. بس ما كملت.. سنتين و طلعت.."
"ليه؟"
بدر: "ظروف.. كان حلمي اصير ضابط.."
"طيب صير.. مافيه شي يردك بدر"
بدر: "الا فيه واجد.."
"لا مافيه.. حاكي صديقك هذا و قوله تعال امسك شغلك، و انت روح كمل اللي تحبه"
بدر: "ليته بهالبساطة.."
"الا به-"
قطع كلامي: "بقى نص ساعة على بريك الغدا، قومي خننزل نشوف لنا مطعم"
فهمت انه مايبي يحكي عن الموضوع..
"طيب تخلص النص ساعة و ننزل"
بدر: "ياليل جوك النايم"
"نظام بدر نظام. مره وحدة بحياتك امشي على النظام، من عرفتك وانت مستهتر"
بدر: "طيب يالنظامية انتي، روحي كملي شغلك و اثنين بالضبط بجيك نروح نتغدا"
"طيب شرايك بهالنص ساعة تعلمني وش اسوي بالجدول هذا؟"
بدر: "لا لا اتركيه هذا ماعليك منه كلام فاضي"
"شلون يعني"
بدر: "شفتي البزر لما تعطينه يد بلاي ستايشن ما تشتغل؟"
"وش هالسخافة بدر!! والله عورني راسي وانا افكر وش اسوي فيه!"
بدر ضحك: "مابي اعطيك شي ماتفهمينه"
"تقوم تعطيني يد خربانه؟"
ضحك.
~
I loved both chapters❤️❤️
ReplyDeletePlease dee chapter 17 nzleh al7een������������
ReplyDeleteYhbl mraa alch tkfeen nzle 17 al7en shranen w 6fshaneeennn����
ReplyDelete