Chapter ٣٥

رجعنا انا و مشاعل من السوق.

و حنا نازلين من السيارة..

مشاعل: "تصدقين تحسفت اني ماخذت الاسود"

"انا تحسفت اني أخذتك"

مشاعل: "ياربيه شفيك مضاوي خلاص قلتلك اسفة من ركبنا السيارة وانتي تقولين لي، هو اتصل كم مره و ماقدرت اتحمل رديت اشوف وش يبي"

"ملقوفة! لا تتدخلين مره ثانية و تردين"

مشاعل: "ان شاءالله حاضر والله منيب رادة"

-"مضاوي مشاعل!"

كنت قاعدة افتح باب البيت .

صوت جاي من الشارع.

التفتنا اثنينا.

مشاعل: "جود؟؟ انتي من الصبح!"

جود: "اشش قصري صوتك، لايسمعونك "

مشاعل: "وين كنتي من الصبح و هم معصبين وش سويتي"

جود: "عادي نركب سيارتك مضاوي نحكي؟"

"ايه .. ايه عادي .."

ركبنا السيارة.

جود: " اخر كلاس بالجامعة كان canceled و البنات قالو بيطلعون، و انا كل مره امي تعيي ماتخليني اطلع، هالمره قالو ميب دارية نطلع و نرجع قبل يخلص الكلاس و يجي سواقك، الزبدة طلعت معهم و سيارة البنت اللي رحنا معها خربت فينا، و ماقدرت تصلحها و تأخرت مره .. والسواق راح الجامعة اتصل عليّ كم مره خفت مارديت عليه.. قام حاكا امي الغبي .. و امي عاد انهارت .. حاكت الجامعة و حاكت ابوي .."

مشاعل: "كل هذا علشان طلعتي مع صديقاتك؟"

جود: "انتي ماتعرفين امي زين .. محجرة عليّ ماتخليني اروح لأحد ولا اطلع معهم ولاشي.. و كل كم يوم تاخذ جوالي وانا نايمه و تشوف وش فيه و من احاكي و وش اقول.. "

مشاعل: "ذكريني كم عمرك"

"مشاعل عن السخافة.. طيب هي ليش كذا؟ يعني يمكن صديقاتك هذولي مب زينات؟"

جود: "لا تعرفهم.. ماتخليني اصادق احد الا اذا تعرفت على امها .. "

مشاعل: "طيب الحين من جابك هنا؟"

جود: "صلحت البنت سيارتها.. و وصلتني.."

مشاعل: "و ليش مادخلتي؟"

جود: "خايفة.. من امي.. من ابوي.."

مشاعل: "ابوي مب قايل شي عادي حنا دايم نطلع مع صديقاتنا"

جود: "لان امي مو امك .. لان محد يقول لأبوك حكي عنك و انك مايصير تطلعين ابد من البيت.. ببيتنا القديم كنت ماطلع من غرفتي علشان عيال خالي موجودين بالبيت.. تحبسني بالغرفة.."

مشاعل: "مع احترامي بس امك ميب صاحية"

جود: "مضاوي.. انا ادري انك كارهتني، ادري اني انا و امي خربنا حياتكم.. بس والله مو ذنبي.. انخلقت بالدنيا لقيتهم اهلي.. ماكان عندي فرصة اختار من امي .. "

"لا عادي .. "

جود: "ابوي يحبك و يسمع كلامك.. عادي توقفين معي؟.. والله تعبت من امي.. تعبت من كثر ما تشك فيني.."

"اوقف معك وش اسوي؟"

جود: "تدخلين معاي الحين.. و تقولين لابوي اني ماسويت شي غلط.. و انا صدق احلفلك بالله اني ماسويت شي غلط"

سكت.

مشاعل: "جود لا تدخلينا بمشاكلك انتي و امك السايكو.. ماشفتيها اليوم تتهم مضاوي تقولها انتي ورا هذا كله و هي ماتدري عن شي، "

قاطعت مشاعل: "لا عادي .. يعني مهما سوت امك، تضلين اختي.. "

مشاعل: "اختك بس امها ميب صاحية ممكن تسوي اي شي! بعدين مضاوي لاتنسين انها تنتظر مننا اي شي غلط علشان تعلم ابوي .. على.."

"لا مايخالف .. ماعندها دليل عليك .. "

مشاعل: "بكيفكم بس انا طلعوني من الموضوع.. شعرتي حمرا عند امك . خطيبي جاي بكره و مابيه يطير قبل يجي."

دخلنا البيت .

انا و مشاعل اول شي .

"السلام عليكم،"

ابوي و مها كانو قاعدين بالصالة.

ابوي: "هلا و عليكم السلام يبا"

مها: "تأخرتوا وينكم، وروني وش شريتو"

مشت مشاعل راحت عند مها توريها.

فجأة نزلت خالتي تركض من فوق .

خالتي: "وينها! وين بنتي!!"

ابوي: "وشفيك بنتك للحين ماجت"

خالتي: "جت شفتها من الشباك تو داخله معهم! هم مرجعينها، قلتلك هم اللي ورا اللي صار بناتك اللي مافيهم خير!!"

قام ابوي: "وين جود يامضاوي"

دخلت جود من وراي.

واقفة وراي و ماسكتني تتغبى وراي و مطلعة نص وجهها.

ابوي: "اني وين كنتي من الصبح!"

جود: "كك-كنت مع ص-ص..صديقاا-تي.."

خالتي: "كذابة!!"

ابوي: "وين كنتي قولي الصدق!!"

"يبا صدق كانت مع صديقاتها.. "

خالتي: "انتي اسكتي مالك شغل فيها!"

"يبا والله العظيم.. هي راحت معهم و البنات كلهم معاي بالجامعة اعرفهم زين.. وراحت بيت وحدة منهم صديقتي مره .. و انا و مشاعل بعد مرينا بيت البنت قعدنا عندهم، و جود رجعت معنا."

خالتي: "شفت ماقلتلك! قلتلك بناتك اللي مو متربيات هم اللي خربوا بنتي! ولا وينها ووين الطلعة و الصديقات!"

جود: "يما البنات مالهم شغل! انا اللي رحت! خلاص كافي اللي تسوينه والله كرهت عمري منك!!!"

خالتي: "انتي ولا كلمة شغلك معي بعدين اشوف لسانك طايل!! علموك بنات منيره قلة الأدب و طولة اللسان!"

مها: "خالتي وشفيك على امي!"

خالتي: "ماعرفت تربيكم امك ياعمري!"

"عرفت تربينا احسن منك و من اللي جابوك كلهم! ولا تجيبين طاريها على لسانك !! مو كافي عليك قاعدة ببيتها و نايمه بسريرها و اخذتي كل شي كان لها  حتى زوجها اخذتيه!!!"

مالقيت الا ابوي عطاني كف .

جود: "يبه!"

ابوي: "انتي على غرفتك بسرعة ولا لك طلعة منها"

اخذت شنطتي و رقيت غرفتي .

ابوي: "غرفتك مابقالها شي تنامين فيها اليوم"

مها: ""مابعد خلصت الغرفة يبه تنام بغرفتنا مايخالف.."

ابوي: "تنام على الارض!!! و المفتاح تسكرينه عليها و تعطيني اياه! "

و راح برا.

. 

قعدت بغرفتي . 

جتني مشاعل ومها.

مشاعل: "مضاوي .. ماتبين عشا؟ اسويلك باستا شرايك؟"

"شكراً مابي"

مها: "طيب نطلب بيتزا؟"

"مابي مب جوعانه .."

جو قعدوا قدامي على السرير.

مشاعل: "والله اوريك فيها هالعجوز انا أأدبها"

مها: "شفتي شلون تعامل بنتها؟ مره تحزن حرام"

مشاعل: "ايه قالتلنا جود، مريضة مره"

مها: "ابوي بعد، مابعمره صارخ علينا كذا زي مايصارخ عليها، حرام حتى الغرفة شلون تنام فيها و هي مافيها اثاث و ريحتها بويا"

"اي غرفة؟"

مها: "اللي قاعدين يسوونها لها، غرفة ملابس امي القديمة،"

"امس شفت عامل يطلع منها امداهم؟"

مها: "ايه هذا اللي اقوله مسكينه شلون تتنفس، و شلون تنام،،قلتله قالي تنام على الارض و تسكرين عليها الباب"

"تسكرين الباب؟"

مها: "ايه خلاني اسكره و هذا المفتاح بروح اعطيه اياه.. رحت قعدت معها شوي و قلتلها اني بسكره انا اسفه.. خلتني اسكره و قالت بتنام.. تكسر الخاطر نامت على الارض، عطيتها مخداتي اللي بغرفتي تحطهم تحت ظهرها.."

مشاعل: "ابوي بعد وش فيه؟ الحرمة قاعدة تحكي على امي .. ليش ما طقها هي؟"

مها: "انا بروح اعطي ابوي المفتاح لا يطلع حرته فيني بعد."

و طلعت مها.

كنا ساكتين انا و مشاعل. 

كنت جالسة و انسدحت على جمبي بالسرير.

ومشاعل قاعدة بجمبي و ساكته.

دق جوالي.

عطتني مشاعل الجوال: "جوالك يدق"

ناظرته ( بدر ) 

حطيته سايلنت و حطيته بالطاولة اللي بجمبي.

دق مره ثانيه.

تركته.

مشاعل: "مارح تردين؟"

ناظرتها: "شرايك تردين انتي بعد؟ مو صار عادي جوالك هو"

مشاعل: "لا ماقلت كذا.. بس يعني فكري فيها.. تراه يحبك.. "

سكت.

مشاعل: "تحتاجين له بهذي اللحظة بالذات .. تحتاجين احد يهوّن عليك و يخليك تضحكين مره ثانية"

"لا ما احتاج له، اراضي نفسي بنفسي"

مشاعل: "لا مارح تقدرين .. ردي و قولي مشاعل قالت. والله بتحسين نص الهم اللي فيك راح .. "

سكت.

مشاعل: "ادري انك تحبينه .. و تحبينه مره بعد.. فا لاتقعدين تكابرين و تسوين ثقل .. ردي ترا بتتحسفين.."

و طلعت برا الغرفة.

و اسم بدر لسا يضوي بالشاشة.

قعدت اناظره شوي .

وقف .

تركت الجوال و غطيت وجهي بالمخدة.

-"يا لو سمحتي"

"نعم"

-"اعوذ بالله وش هالنفس الخايسة يا كافي"

"ايه انا نفسي خايسة ممكن تسكت و تخليني بحالي؟"

-"لا ميت عليك انا، والله مصدقة عمرك مسكينه" 

"وشفيك ترجفين؟ بردانه؟"

"ما يضحك"

-"بعدين احد يلبس فستان بالطيارة الله يصلحك"

"وش عليك مني انت البس اللي البسه"

-"طيب ليه ما تقومين تسكرينه؟ فوقك هو"

"ما اطوله"

ضحك-"اقوم اسكره لك؟"

سكت.

-"ها تبين اسكره؟"

"ايه.."

قام و سكره.

"شكراً"

-"العفو، تدفي ماعندك شي تتدفين فيه؟"

"بالشنطة عندي الحين اجيبه"

-"انا اجيبه انتي ماطلتي المكيف بتطولين هذا" ضحك.

"بتظلين طول عمرك خبله و ماتعرفين تتصرفين اذا فكرتي كذا، لازم تصيرين عاقلة علشان تطلعين بأقل خسارة بالنهاية"

"ايه خبله، ما اقدر اسكت عن حقي"

بدر: "ماعندك حل غيره، اذا حكيتي محد بيصدقك"

"ليه قاعد تسوي كذا؟"

بدر: "وشو"

"يعني تقدر بكل بساطة تسحب شنطتك و تروح بيتكم، ليش توجع راسك معي بهالسوالف"

بدر: "لاني ادري انك مظلومة و محتاجة"

بدر: "انتي اللي اسمعي، تتابعين افلام اكشن واجد الظاهر، عطيني جاكيتي و خلنا نروح نشوفهم ما عليهم هم وش داخل الشنطة اهم شي مافيها شي ممنوع" 

"انت اللي تتابع اكشن واجد! انت السبب باللي حنا فيه! لو ما تفلسفت و قلت هذي شنطتي كان طلعنا الحين، بعدين انا مادري انت وش جابك اصلا! مو على اساس وصلنا و كل واحد بيروح بيته و بفتك منك!"

تذكرت كل تفاصيل هذاك اليوم.

أول يوم شفته فيه .

كأنه صدق انسان ثاني ..

كنت اناظره و اقول يا بخت اللي يحبها.

شخصيته كانت بالرغم من انها مستفزتني الا انها كانت حلوه

بدر كان نفس شخصيتي .

شخصيته قويه ..

مانصلح مع بعض، علشان كذا كنا كله نتهاوش ..

حسيت اني صدق أشتقت لهذيك الايام.. 

يعني ما مر كثير عليها .. من كم شهر .. 

بس احس اشياء كثير تغيرت ..

اشتقت لبدر اللي شفته بأول يوم.

اشتقت للمستهتر اللي يتأخر و يدخل اخر واحد للطيارة..

اشتقت للغبي اللي مايفكر انه مب زين يدخن بالطيارة..

اشتقت للملقوف المزعج اللي كان يقط معي بكل شي اسويه..

اشتقت للسخيف اللي يتطنز عليّ علشاني ما طلت مكيف .. 

اشتقت للوصخ اللي قلتله افصخ جاكيتك وفهمها شي ثاني..

دمعت عيوني .. 

رحت فتحت الدرج ادور دخانه و ولاعته اللي نساهم بشنطتي هذاك اليوم ..

ريحته فيهم صدق .. 

الولاعة ريحتها عطره .. 

حطيتهم بالدرج اللي بجمبي .. 

اشتقتله .. 

ترا نفس الشخص اللي اشتقتليه قاعد يدق عليك .

قاعد يدق و انتي ماتردين عليه ..

قمت اخذت جوالي و اتصلت عليه .

#- الو

#- .... 

#- مضاوي

#- ايه هلا.. اسفه كنت بالحمام .

#- ايه لامايخالف.. زين احسبك ماتبين تردين متقصده..

#- لاشدعوه.. 

#- شلونك..

#- الحمدلله زينه .

#- اتصلت اقولك شرايك نطلع بكره؟ عندي لك مفاجأة

#- بكره لا ماقدر 

#- ليه

#- بكره بيجي ولد جارتنا يخطب أ-

قاطعني #- يخطب مين

#- مشاعل اختي

#- اه .. ايه مشاعل اختك اشوه

#- فا لازم اقعد اجهز تعرف الخدامه ماتقدر تسوي بلحالها.. و بقعد مع مشاعل بعد حرام اتركها

#- ايه لا لاتتركينها.. طيب الصبح؟

#- عندي جامعة

#- عقب الجامعة؟ 

#- اخلص ٤ بكره، ماقدر ابي ارجع انام 

#- ماعندك بريك؟

#- الا.. خلاص بالبريك. من ١٠ ل ١٢

#- خلاص زين.. امرك؟

#- لا انا اجي بلحالي مايخالف، وين؟

#- اللي تبين انتي اختاري المكان .

#- بدر 

#- عيونه

#- تذكر لما قلتلي بتظلين طول عمرك خبله وماتعرفين تتصرفين؟ و قلتلك باخذ دورات عندك؟

#- ايه؟ *حسيت فيه و هو يبتسم وهو يقولها*

#- ماعطتيني الدورات هذي .. احتاج لها.. 

#- اعطيك اياها انتي بس آمري 

#- اشتقت لهذاك اليوم ..

#- انا بعد

#- اقدر اقول انه كان احلى و اشين يوم بحياتي بنفس الوقت

#- ليش اشين يا كافي

#- يعني كانت نفسيتي مو مره، و كنت انت صدق منرفزني 

#- كنتي غبية مره ذيك الايام

#- انت اللي كنت غبي 

#- احد يلبس فستان بالطيارة؟

#- احد يدخن بالطيارة؟

#- احد يقول لموظفة المطار انا هاجة مع حبيبي ولا تقعدين تغازلينها؟ * و ضحك *

ضحكت #- وش دراك

#- قال لي صالح

#- صالح مين؟

#- حق التفتيش اللي هناك

#- يع الكريه

#- ايه *ضحك* 

صادقة مشاعل ..

حسيت نسيت اللي صار شوي ..

حسيت رجعت اتنفس من جديد لما حاكيته .

مجرد شعور انك تدرين ان فيه احد يحبك ، يخليك ترتاحين.

فيه احد يهتم، فيه احد زعلّي عنده مشكلة كبيره ..

فيه احد يسوي اي شي علشان رضاي .. 

نمت و انا احاكي بدر امس

قمت الصباح تحممت و لبست و نزلت تحت .

كانوا قاعدين يفطرون .

ابوي، خالتي، مها.

مها: "مضاوي ماتبين تفطرين؟"

"لا افطر بالجامعة بالعافية، "

و طلعت .

كانت اول مره بحياتي اشوف ابوي و ما احب راسه 

او هو يشوفني و ما يهلي و يرحب فيني .

وانا بالطريق أرسل لي بدر مسج.

" الساعة ٧:٤٥، و مخي مايفكر الا فيك.. 

على حاله كل يوم .. مايفكر الا فيك ، متى او وين ما يهمه، 

جيتي و غيرتي لي كل حياتي، ممكن تحسين اني ما احكي واجد او ما احسسك باللي انتي سويتيه لي، بس صدقيني غيرتي فيني اشياء واجد .. صدقيني مضاوي حبيتك حب ما تتخيلينه .. خايف عليك من نفسي .. ودي امسح كل يوم قضيته من عمري وانتي موب معي فيه .. ودي نرجع اثنينا ننولد من جديد.. و نقضي كل عمرنا مع بعض .. ودي اخذك و نروح مكان مافيه احد .. و نعيش هناك سنين .. صدقيني مارح أمل منك .. كل يوم اكتشف فيك شي يعجبني .. كل يوم القا فيك شي يخليني احسد نفسي عليك .. اتمنى من كل قلبي اني اقدر صدق اخليك اسعد انسانه بهذي الدنيا .. 

صباح الخير يا أجمل شي صار لي بالدنيا " 

ابتسمت .

وصلت الجامعة .

شفت لطيفة قاعدة تشرب قهوه، رحت لها .

"صباح الخير"

لطيفة: "صباح النور"

"شلونك"

لطيفة: "كويسة، انتي؟"

"مره كويسة" و ابتسمت.

عطيتها تقرا اللي ارسله بدر .

ابتسمت : "كيوت.. ماشاءالله، الله يخليكم لبعض .."

"امين، "

كان فيه بنات قاعدين بجمبنا يدرسون شي.

ناظرتهم: "يا الله .. الله يعينهم مالي خلق الفاينلز، ببدى الاربعا مره ماحسني مستعدة نفسياً"

لطيفة: "هانت اخر سمستر"

"ايه والله اشوه، "

كان بجمبها كتاب .

"يووه اذكر هذا الكتاب "

لطيفة: "درستيه؟"

"ايه السمستر اللي راح، جبت A + بعد "

لطيفة: "ماشاءالله عاد احسه صعب"

"صعب بس كنت احبه، اذكر كانت المدرس مره زين فا خلى كل الكلاس يحب المادة"

لطيفة: "ما احسني بحبها ابد.. عندي اختبار فيها اليوم"

"نصابة"

لطيفة: "والله، "

"طيب و كيف؟ تحسينه سهل؟"

لطيفة: "مادرست.."

"لا صدق؟"

لطيفة: "والله .. "

"ليش!"

لطيفة: "امس شفت سعد عقب الجامعة .."

"شفتي سعد و تركتي دراستك تستهبلين صح؟ مب طاير سعد! دراستك اهم!"

لطيفة: "لا موب كذا .. طلعت معه و.. قالي انه مريض .. "

"مريض ؟ طيب؟ و بعدين؟"

لطيفة: "مضاوي سعد مارح يعيش اكثر من سنه.."

"من قال"

لطيفة: "الدكاتره قالو.. خذي شوفي هذي الورقة عطاني اياها"

"طيب اكيد له علاج "

لطيفة: "له ادوية تخفف الالم.. بس مايعيش اكثر من سنه"

"اكيد فيه عملية "

لطيفة: "مافيه شي .."

"طيب اسمعيني لطيفة، فكري بعقلك الحين، يعني الولد مريض الله يشفيه و يعافيه ان شاءالله، بس هذا مو سبب يخليك ماتدرسين لاختبار فاينل! سمعتي الاستاذة يوم قالت لك ان درجاتك مره موب زينه و مارح يساعدك و يرفع معدلك غير الفاينل! لو ماسويتي زين فيه مارح تنجحين بالكورس هذا"

لطيفة: "ادري .. و سمعتها.. والله حاولت ادرس امس ، كل ما فتحت الكتاب  اتذكر اللي قالي اياه، مابيه يموت مابي اخسره هو بعد! تخيلي يموت وش اسوي بعمري انا؟"

"تخيلي تعيدين الكورس هذا و ما تتخرجين؟"

"لطيفة انا موب ماعندي قلب بس فكري ب الحين! 

تخيلي سقطتي وش تسوين"

"طيب حاكي الاستاذة قوليلها كنت مريضة اي شي"

لطيفة: "رحتلها من الصبح قلتلها، عيت"

ناظرت الكتاب اللي كنت ماسكته.

"طيب، انا بختبر عنك ،"

لطيفة: "شلون؟ مايصير "

"اجل يصير تسقطين؟ تبين ماتتخرجين الا السمستر الجاي؟"

لطيفة: "مابي بس.."

"الساعة كم الاختبار؟"

لطيفة: "عشرة ونص .."

"طيب زين فيه وقت .. عطيني الID حقتك و خليني اشوف الكتاب شوي اراجع "

لطيفة: "مضاوي مره شكراً صدق .. مادري وش كنت بسوي بدونك"

"كنتي بتاكلين تبن و تتعلمين شلون تدرسين زين قبله"

لطيفة: "طيب مو قلتي اخذتيها السمستر اللي راح؟ لسا تذكرينه؟"

"ايه لاتخافين، نسيتي النوتس حقتي؟"

ضحكت لطيفة: "اقدر انساها ماشالله عليك؟"

ارسلت لبدر مسج : 

"بدر انا اسفه ماقدر اجي طلعت لي سالفة ماقدر اطلع من الجامعة :("

...

..

.

-مشاعل- 

طلعت من غرفتي الساعة ١٠.

طلع ابوي بوجهي .

ابوي: "انتي مارحتي المدرسة؟"

"لا.."

ابوي: "ليش"

"تعبانه.. بطني توجعني شوي .."

ابوي: "اليوم بيجي شسمه.. مساعد؟"

"ايه.. اليوم عقب صلاة المغرب ."

ابوي: " ان شاءالله .."

و نزل تحت .

كنت قاعدة بالصالة فوق سمعته يحكي مع خالتي بس ماسمعت زين وش يقولون ..

عقبه طلع هو , وخالتي قعدت بالصالة.

رحت للغرفة اللي فيها جود و فتحت الباب .

دخلت و سكرت الباب بالمفتاح وراي.

ناظرتني جود: "مشاعل؟ وش فيك"

"اشش.. لايسمعون.. خذي جبتلك اكل .. ترا هذا كان فطور امس حق المدرسة جبته من غرفتنا علشان كذا بارد .. و هذا عصير برتقال للاسف ماعندنا ثلاجة بالغرفة علشان كذا حار، امك تحت خفت انزل و تشوفني جايبته لك .."

ابتسمت: "يازينك شكراً، ليس مارحتي المدرسة؟"

"نمت متأخر امس .."

جود: "من وين لك المفتاح؟ ماعطيتوه ابوي؟"

"هذا واحد ثاني، قبل فترة مها دخلت هنا و سكرت الباب و داخت، فا كان لازم نكسر الباب، و اليوم اللي بعده جا عامل صلح الباب و عطاني المفاتيح، حطيت واحد على الباب وواحد ماعرفت وين احطه خليته عندي بالغرفة، و زين اني تذكرته تو"

جود: "زين .. " و ابتسمت. 

 "متوتره يختي قاعدة افكر باللي بيجي اليوم.."

جود: "مساعد؟"

"ايه .. مدري وش اقوله وش نحكي فيه .. احسني مارح احكي من الروعة بقعد ساكته"

ضحكت جود: "لا لا بتحكين، اول ماتدخلين بتكونين خايفة شوي بس يحكي هو بتحسين خلاص مايخوف و بتصيرين تحكين"

"طيب ب وشو الناس تحكي احس ماعندي سوالف"

جود: "وانتي من قالك بتسولفين ياحظي؟ بتقعدون تحكون كل واحد عن نفسه، دراسة شغل كذا"

عقدت حواجبي: "كيف تعرفين هالاشياء؟ تحكين كأنك انخطبتي مليون مره"

جود: "مو مليون عاد.. مره وحدة"

"صدق؟ قولي والله؟ شلون طيب ليش ما تزوجتي؟"

جود: "علشان امي رفضته .."

"ليش؟"

جود: "كان اخو وحدة معاي بالجامعة، مره ماقدر السواق يجيني و هي وصلتني.. و هو كان اللي يسوق .. جت عقبه بكم يوم قالت اخوي يبي رقمك ومدري وشو قلتلها لا طبعاً انه امي تذبحني لو درت .. و صار هو عند باب الجامعة يوقف كل يوم و يسلم عليّ، كنت دايم اقوله ان امي صدق ممكن تذبحني لو درت .. قالي ابجي اخطبك .. و جا و خطبني و امي وافقت و كل شي .. عقب فترة درت انه اخو صديقتي.. و جات في بالها الف قصة و قصة .. تحسب اني احبه او بيني و بينه شي .. و رفضته"

"علشان كذا ماتخليك تطلعين مع صديقاتك؟"

جود: "ايه .. خلتني اقطع علاقتي بالبنت .."

"اف ليه كل هذا ترا الولد جا يخطب يعني حتى ولو كان بينكم شي جا يبيك بالحلال"

جود: "هي ما تفكر كذا.. هي تبي كل شي بكيفها ، تبيني اخذ اللي هي تبيه، من وانا صغيرة ليومك هذا تبيني حق ولد خالتي .. متزوج مرتين و منفصل.. و كلهم يقولون انه مريض نفسي و يطقهم، بس هي لما اقولها، تقول لا ولد اختي مافي مثله .. كانت تبي تزوجني اياه غصب يوم تخرجت من الثانوي، كانت كل يوم تطقني علشان اوافق، بس الحمدلله ابوي مايحبه قالها لا ميب ماخذته، و خلاني ادخل الجامعة.."

"تطقك؟ ياربيه ماعندها قلب هذي؟ يعني ترا بنتها"

جود: "يووه.. تعديت مرحلة اني اسأل هالسؤال من زمان .. من وانا صف رابع وانا اسأل نفسي هالسؤال.. ماعندها قلب؟ موب بنتها انا ؟ تدرين .. كانو البنات بالمدرسة دايم يضحكون عليّ من وانا صغيرة .. كنت البس ملابس باكمام طويلة بعز الصيف .. علشان لاتبين اثار الضرب اللي بأيديني و رقبتي .. "

سكت.

جود: "بس الحمدلله الله عوضني.. يعني لا أم ولا أبو بس عطاني خوات .."

ابتسمت.

جود: "عطاني اخت تجيب لي عصير برتقال حار يالله لك الحمد وش ابي اكثر من كذا؟" و ضحكت .

...

..

.

الساعة ٦:٣٠ .

مشاعل: "اح شعري شوي شوي!!"

مها: "لا تتحركين طيب!!"

مشاعل: "ياربي مها عجلي مره باردة تراك"

مها: "احمدي ربك قاعدة اسويلك انتي و شعرك الكشة"

مشاعل: "ازين من شعرك"

"والله مب صاحين، ترا شعوركم نفس ، "

مشاعل: "قوليلها لا تقعد تتفلسف"

"وش كثر باقي لك مها"

مها: "خلاص بس شوي"

"لانه قلت لسوزي تجيب البخور هنا بعد شوي"

مشاعل: "فستاني وينه"

"معها قلتلها تجيبه بعد"

مشاعل: "تعالي حطيلي مناكير بليز مابي يقول موب انثى"

ضحكت مها: "جت على المناكير الحين؟"

مشاعل: "كلي زق بس،"

ضحكت: "مها حرام عليك خليها، اذا خلصتي احطلك علشان ما يقول موب انثى .. الا اختي انثى و نص بعد"

مشاعل: "تتطنزين انتي الثانية؟"

ضحكت.

.

بالليل كنت احاكي بدر .

قلتله على مشاعل اليوم .

#- انا متى اجي؟

#- انت خلني اعرفك زين اول بعدين تعال

#- افا 

#- صدق .. شلون تبيني اتزوجك وانا ادري انك مغبي عني اشياء واجد؟

#- هانت هانت مابقا شي 

#- ان شاءالله .. ايه صح بدر اليوم قالولنا على حفل التخرج بالجامعة .. شرايك تجي؟

#- اجي شلون؟ عادي؟

#- ايه هم مخلينها مو بس بنات لانه انه لو ابو طالبة او اخوها يبي يجي عرفت ؟ 

#- ايه اجي اكيد كم مضاوي عندي

#- صدق؟ يعني اجيب لك تذكرة مع خواتي و ابوي؟

#- ايه.. متى هو؟ 

#- الويكند الجاي ..

#- اي يوم؟

#- الخميس

#- اوه خميس .. 

#- عندك شي؟

#- لا لا فاضي .. 

#- طيب زين.. خلاص بكره بروح اشتري التذاكر ..

....