"اختي حسابك ٢٣، يعطيك العافية تفضلي الفاتورة خمس دقايق و طلبك يكون جاهز"
ناظرت الخاتم اللي بأيدي ..
تذكرت سعد.
كلامه اللي يدور في بالي من امس .
اتزوج؟
انا قلت ببدا حياة جديدة ايه ..
بس موب أني اتزوج،
تركت سعد بدون جواب أمس ..
عطاني الخاتم و خلاني اروح ..
و للحين ادعي انه مايتصل علشان ما يسألني ..
مادري وش اقوله ..
-يا لوسمحتي!
"هاه نعم"
-صارلي ساعة احكي معك
"انا اسفه تفضلي وش طلبك"
طلبت الحرمة و عطاها عبدالله و راحت .
عبدالله: "شفيك اليوم موب على بعضك؟ لايكون علشان هوشه امس؟"
"لا بس موب نايمه زين"
عبدالله: "سعد موب جاي اليوم؟"
"سعد؟ وش فيه؟"
عبدالله: "اقول موب جاي اليوم؟"
"مادري ماكلمته .."
عبدالله: "عادي اسألك سؤال؟"
"ايه؟"
قاطعنا -لو سمحتي ابي واحد فرابتشينو
ناظرته: "هلا اخوي تفضل اي حجم؟"
و راح عبدالله يسوي له طلبه .
بعد الدوام
كان ويكند و طولنا الين الليل .
سكرنا المحل و كنا نمسح الطاولات انا و عبدالله .
لاحظت ان عبدالله وقف موب قاعد يمسح .
رفعت راسي اناظره
لقيته يناظر الخاتم اللي بأيدي
ناظره: "شفيك"
عبدالله: "ماشاءلله الخاتم، حلو"
"شكراً"
عبدالله: "انخطبتي؟"
"ليش اذا لبست خاتم لازم اكون انخطبت؟"
عبدالله: "لا موب كذا بس يعني لابسته باليمين"
"مو شرط، خاتم عادي هذا"
عبدالله: "ايه زين .."
تركته و رحت ابدل .
"يلا مع السلامة اشوفك بكره ان شاءالله"
عبدالله: "لطيفة"
"هلا؟"
جا قرب شوي : "فيه شي ودي اقولك اياه بس مستحي"
"خير؟ قول؟"
عبدالله: "عادي تعطيني رقم الوالدة؟"
"الوالدة؟ شتبي فيه؟"
عبدالله: "اهلي بيزورونكم"
ناظرته مستغربة: "يزورونا ليش"
عبدالله: "مافهمتي يعني"
"لاتقولي رموز و مفروض افهمها، قول وش تبي بالضبط؟"
عبدالله: "لطيفة انا حكيت لامي عنك، وقلتلها تخطبك"
رفعت حواجبي: "تخطبني؟"
عبدالله: "ايه؟ "
"لك؟ انه انا و انت؟"
عبدالله: "ايه؟ ليش ماتبيني؟"
"موب سالفة ما ابيك بس .."
عبدالله: "لطيفة انا احبك"
وخرت عنه خفت .
"بس عبدالله انت زي اخوي يعني انت زميل عمل و بس"
عبدالله: "علشاني اشتغل هنا صح؟ علشاني موب كاش نفس حبيب القلب سعد؟ علشان سيارتي موب نفس سيارة حبيب القلب سعد؟ لو سعد اللي قايل هالحكي كنتي وافقتي"
"شدخل تشتغل هنا و شدخل سعد! الموضوع مو كذا! عبدالله انا مابي اتزوج الحين"
عبدالله: "لا الموضوع كذا. عالعموم فهمت اللي تبين تقولينه، الله يوفقك مع سعد. "
و دخل جوا .
مريض؟
طلعت و رجعت بيتنا .
أتصل عليّ سعد .
-الو
-هلا لطيفة
-اهلين
-متأخرة اليوم ليش؟
-ويكند ماعندي دوام بكره
-امم.. شفتكم تسولفون من القزاز،
-مين؟
-انتي واللي يشتغل معك، شفتكم وانا برا
-ليش مانزلت
-مدري قلت مابي اضايقك
-شدعوه تضايقني
-وش قالك؟
-مين؟
-عبدالله
-ماقال شي يسولف عادي
-اممم.. طيب، بتروحين مكان الحين؟
-برجع البيت يمكن
-فكرتي بموضوع امس؟
-سكت-
-خلاص مابي اضغط عليك، متى ماتبين تحكين احكي
-ان شاءالله
-طيب حبيبتي تبين شي؟
-سلامتك
-الله يسلمك، مع السلامة
-باي ..
قعدت بغرفتي مادري وش اسوي ..
صدق مخي يعورني
مضاوي كانت دايم تقولي سعد يحبك
بس مابعمري فكرت انه صدق صدق يحبني
انصدمت من اللي قاله امس
اتصلت على مضاوي ما ردت
ماعرفت اتصل بمين ..
طلعت ريم ..
حطيتها على المخدة و حطيت راسي بجمبها ..
و حكيت لها كل شي صار مع سعد ..
- مضاوي -
اليوم الي بعده الصبح
كنت احكي مع اسما
قلتلها على بدر .
-مو من صجج؟
-ليش
-يعني اوكي اهوا وضعه غريب و تحسين وراه شي بس مو جذيه
-وش تبين اسوي له؟
-اوقفي بصفه
-ليش هو وقف بصفي علشان اوقف بصفه؟
-ماتدرين اكيد عنده سر
-اسما مو وقت افلامك
-حبيبتي ماخذة ٣ كورسز قانون و محاماة
-اه والمطلوب اني اسمع كلامك علشانك ماخذتهم ؟
-ايه
-ان شاءلله
-مضاوي صج
-وشو
-مره وحدة بحياتج خذي بنصحيتي و سمعي كلامي
-سكت-
-كلميه الحين و فهمي منه ليش يسوي جذيه
-مابي
-حرام والله مسكين ظالمته انتي
-الحين انا ظالمته؟ هو مو ظالمني؟
-لا
طلع اسمه فجأة على الشاشة.
-اسما بدر يتصل
-ردي!
-مابي ارد وش اقول!
-ردي يالخبله شوفي شيبي! علميني شيصير باي
سكرت اسما و رديت على بدر .
-الو
-هلا، صحيتك؟
-لا صاحية من اول
-زين انك رديتي ..
-خير بدر شعندك؟
-يصير اشوفك؟
-لا مايصير
-مضاوي بليز انتي موب فاهمة السالفة
-لا فاهمتها و فاهمتها زين بعد
-مضاوي صقر ماسك عليّ شي خطير، و موب قادر اتكلم علشان لا يفضحني
-وش ماسك عليك
-شي مايصير اقوله لأحد
-انا موب احد!
-انتي موب أحد بس انتي بعد مايصير اقولك
-طيب شتبي مني الحين؟ داق تقولي فيه شي ماقدر اقوله لك؟ شتبي؟
-داق اقولك انه قلت لصقر معد ابي اشتغل معه،
-سكت-
-بس مارح يتركني كذا، قالي تشتغل ٣ اشهر تعوض كل شي و بعدين تطلع
-٣ اشهر و بتقولي عقبها وش ماسك عليك؟
-ما اقدر
-شلون يعني ماتقدر وش بيصير فيك!!
-بتصير اشياء موب متخيلتها انتي
-قولي اياها طيب اقدر اتخيل
-لا
-بدر عن الدراما،
-صدقيني مضاوي .. بليز بترك الشغل علشانك ..
-لا تتركه خلاص خلك معه
-لا ابيك انتي مابيه
-عقب وشو
-سامحيني نفتح صفحة جديدة تكفين
-سكت-
-مضاوي لو سمحتي، عطيني فرصة مابي افرط فيك ..
-طيب.. بصدقك هالمره يابدر و بقول لنفسي انك صدق تحبني، بس ترا اللي يحب ما يغبي شي عن اللي يحبه
-حتى لو كان بيخليني اخسرك؟
-بيخليني اخسرك؟
-ايه .. علشان كذا ماقدر اقوله
-ليش متأكد انك بتخسرني طيب؟ جربني؟
-لا مابي اغامر
-طيب بكيفك سو اللي تبيه انا مالي شغل، انا بسكر الحين
-مسامحتني؟ بتردين عليّ؟
-مسامحتك بس مو مصدقتك ، مسامحتك لأني غبية
-غبية؟
-ايه غبيه.. بسوي اني مصدقة بس مارح اصدق.. موب علشان شي بس علشاني أحبك .. علشان مابي اتحسف بعدين اذا رحت،
-مضاوي
-غبية لأنك دست على كرامتي و لسا ابيك ، غبية لاني مو متأكدة اذا انت صدق تبيني بس مابي افرط فيك ..
-سكت بدر-
-بدر انا لازم اسكر بنزل اشوف خواتي
-طيب متى نحكي
-مادري .
-طيب .. اذا فضيتي علميني، مع السلامة
و سكرت .
قعدت افكر باللي قاله ..
بدر مايبي يقولي شي علشان مايخسرني؟
ليش خايف انه يخسرني؟
انه بدر دايم يقول اي شي حتى لو كان يضايقني ولا همه؟
يعني مابعمره قعد يحسب حساب كلامه اذا بيزعلني او لا
ليش هالمره حسب حساب زعلي ..
جيت ابطلع من غرفتي فتحت مشاعل الباب .
"بسم الله"
مشاعل: "شفيك"
"لا كنت ابطلع تو وفتحتي الباب"
مشاعل: "بتطلعين وين بتروحين؟"
"بنزل تحت "
مشاعل: "طيب ابحاكيك شوي .."
"خير؟"
مشاعل: "اقعدي طيب"
قعدت على سريري .
سكرت مشاعل الباب و قعدت .
مشاعل: "ادري انك مب طايقتني بس ابي اقولك شي"
"ليش موب طايقتك"
مشاعل: "علشان الي سويته"
"من يقول موب طايقتك عادي"
مشاعل: "علشان سلطان"
"هو اللي موب طايقته موب انتي، انتي مالك ذنب"
مشاعل: "بس انا غبية .."
"ماكنتي تدرين ماعليه .."
مشاعل: "المفروض دريت، عرفت انه كذاب.. انعميت كنت اشوفه يموت عليّ"
"مو مشكلة تعلمتي من غلطك، زين بس جت على كذا ما صار شي ولا سوالنا مشاكل، انتي الحين لا تكلمينه ولا تقولين له شي"
ناظرت مشاعل الارض : "بس.."
"وشو"
مشاعل: "كلمته ، و قعدت اسبه و ادعي عليه و ارسله مسجز ادعي عليه "
"موب صاحية خبله انتي! تخيلي عصب و قال بقول لأبوك!"
مشاعل: "قال .."
"قال!"
مشاعل: "ارسلي صورة لي قالي بنشرها .."
"صورة شلون! وش لابسة!"
مشاعل: "لا لا لابسة شدعوه"
"طيب اشوه عادي، محد يقدر يقول شي"
مشاعل: "ماعليّ من الناس انا همي ابوي "
"نقوله من انستقرام احد ماخذها و ناشرها "
مشاعل: "لا مايصير .."
"ليش"
مشاعل: "الصورة .. "
"مو قلتي لابسة و الصورة مافيها شي؟"
مشاعل: "مصوره انا وياه .."
سكرت عيوني : "لا لا مشاعل قولي انك تمزحين الله يخليك"
مشاعل: "ارسلي اياها و ارسل فيديو نسولف فيه انا وياه"
"حماره؟ بقره؟؟ ماتفكرين انتي خبله!!!؟ مابعمرك فكرتي انه ممكن يسوي شي بهالفيديو!!! "
مشاعل: "والله ولا لحظة فكرت ..."
"لا و رايحة تحارشين الولد بعد؟ ليش تكلمينه تسبينه ليش!"
مشاعل: "مقهوره ماعرفت وش اسوي قهرني!"
"تقومين تفضحين نفسك بنفسك؟"
مشاعل: "وعد تقول كلمي الهيئة"
"بيحطون اللوم عليك، لو هو ناشر صورتك بلحالك طيب، بس انتي وياه.. انتي بعد غلطانه تصورين معه بيقولون ، و هم صادقين ترا!"
مشاعل: "طيب وش نسوي"
تنهدت: "مادري .. وش قالك وش بيسوي بالفيديو؟"
مشاعل: "قال لو ما تتأدبين اوريه ابوك"
"طيب اسمعيني صدق هالمره ، لا تكلمينه ولا تقولين ولا شي"
مشاعل: "حاضر.."
"ولا شي مشاعل، ولا تسبينه بمكان ثاني ولا شي، انسيه "
مشاعل: "ان شاءلله"
"مادري وش نسوي صدق .. لازم الصور و الفيديو مايكونون عنده .."
دق جوالي ..
( لطيفة )
رديت .
-هلا لطيفة
-شلونك مضاوي
-زينه الحمدلله انتي شلونك
-الحمدلله، اسمعي بسألك عن شي
-سمي
-شفتي كيكة خواتك اللي سويتيلهم اياها بعيد ميلادهم؟
-ايه؟
-عادي ترسلين لي رقم المحل و عنوانه؟
-ايه الحين ارسلك
-طيب اسمعي بسألك وش تحسين اسوي لسعد، رقوه بالشغل .. ماعرفت وش احط المحامي وش يحطون له؟
-مدري اسألي حق المحل يعرف هو ..
-طيب شكراً مره .
-لحظة لطيفة
-هلا
-سعد محامي؟
-ايه؟
-طيب عادي اسأله عن شي؟ انه مشكلة صايرتلي؟
-خير وشفيك؟
-لا موب انا اختي ..
-اوه.. ايه اسأليه
-بقولك السالفة و تقولينها له بليز طيب؟
-طيب اوكي ..
قلتلها سالفة مشاعل كلها ..
و قلتلها اني مابي اكلم هيئة لان اختي هي الغلطانه ..
و ابد مابي يعرفون اسمها او شي ..
لان ابوي يعرف ناس هناك ..
قالتلي انها بتقول لسعد و ترد لي .
...
-الساعة ٩ و نص بالليل-
كنت انتظر بالمطعم،
شفت سعد دخل .
ابتسمت.
سعد: "ها عسا ما تأخرت عليك؟"
"لا توني جاية انا"
سعد: "اشوه زين"
جلس على الكرسي .
و شاق الضحكة .
سعد: "ها نطلب؟ ميت جوع"
"تبي تطلب؟"
سعد: "ايه؟"
"طيب ناد الرجال"
اشر سعد بأيده لواحد من اللي يشتغلون .
و رجع التفت عليّ: "ايوا انتي وش تبين تاكلين؟"
جا الرجال من وراه و معه الكيك اللي سويته له .
حطه على الطاولة .
سعد: "هذا حق مين"
ضحكت: "حقك"
سعد: "انا؟ ليه"
"علشان الترقية شفيك"
ابتسم: "اوووه، شكراً شكراً ليش تعبتي نفسك"
"لا تعب ولا شي .. بعدين عندي شي ثاني بقوله .."
سعد: "وشو"
"انت سألتني سؤال قبل امس .. تذكر؟"
سعد: "اقدر انسى هالسؤال انا؟"
ابتسمت: "الزبدة اني فكرت .. "
سعد: "ايه؟"
"وو.. و انا موافقة.."
قام سعد من الكرسي: "موافقة! لحظة اي سؤال اخاف انا ملخبط؟ يعني اللي في بالي هو اللي موافقة عليه؟"
ضحكت: "اقعد سعد الناس تناظر"
سعد: "انتي موافقة تتزوجيني صدق صدق؟"
"قلتلك ايه خلاص لاتقعد تفشلني تعيده كم مره"
سعد: "عمري انا عمري!!!!"
ضحكت: "فشلتنا قصر صوتك تستهبل"
سعد: "طيب متى؟ يلا بكره نتزوج تكفين"
"لا لا موب بكره، مابي اي شي قبل اخلص جامعتي و اتخرج، هو بس شهر بقا"
سعد: "خلاص اللي تامرين عليه اهم شي انك معي ، "
ابتسمت.
سعد: "يا الله لطيفة والله لو تدرين وش كثر مستانس احسني اكثر انسان محظوظ بالدنيا"
....
...
..
يجننن يجننن يجننن توني اشوف انك منزله صدق مررررره حلوووو❤️❤️❤️ كل مره اقول هذا التشابتر احلى ولما ينزل الثاني يطلع احلى من اللي قبله اتتعبببب وانااا اقووول يجننن يااا اللله!
ReplyDeleteThe besssstttttr😍😍😍😍❤️❤️❤️
ReplyDeleteA7laaa blooogg!!����
ReplyDeleteYallhh!!!
ReplyDeleteA7laa blogger wallh):
Thanx):::|