Chapter ٢٥

CHAPTER 25

.

-بالجامعة-

كان عندنا محاضرة انا و لطيفة مع بعض .

بس خلصناها رحنا قعدنا بالقعدات اللي بالجامعة .

لطيفة فكت شوي .. بس احسها مهما تبتسم لي بالها مو معاي .. 

احسها سرحانه باشياء كثير .

هي بعد البريك عندها كلاس، 

انا خلصت بس قلت بقعد معها شوي ..

قلتلها على سالفة بدر بما أنه قال انه يحبني رسمي .

كانت صدق مو معي ..

"لطيفه شفيك مافي اي تعابير بوجهك؟ الحين قاعدة اقولك قصتنا وانتي من بديت وانتي تبتسمين"

لطيفة: "قاعدة اسمعك لاتخافين، فلم هندي قصتكم"

ضحكت: "بس قصتكم انتوا احلى"

لطيفة: "انتو مين"

"انتي وسعد"

لطيفة: "انا وسعد مابينا اي شي، واذا هو قال غير هالحكي ف انا اقولك اني انا عن نفسي ما احب سعد"

"بس .."

قاطعتني: "مضاوي لو سمحتي لاتفتحين لي موضوع سعد ابد، انا سكرت صفحة سعد و فتحت صفحة جديدة، صفحة مافيها لا سعد ولا غيره، ولا بيصير فيها احد ان شاءلله"

سكت .

خوفتني صراحة .

--" اخيراً لطيفة قاعدة فاضية ماعندها شي،"

التفتت لطيفة. 

لطيفة: "اهلين هلا حبيبتي"

جود صديقة لطيفة.

قعدت البنت بجمبي.

جود: "شلونك وش اخبارك وشلون الجامعة معك؟"

لطيفة: "والله الحمدلله"

ناظرتني البنت و ابتسمت: "انتي شفتك قبل كذا صح؟"

لطيفة: "ايه ايه مره سلمتي عليها"

ابتسمت.

جود: "اه لطيفة انا ترا مواعده بنات بقعد معهم عادي يقعدون هنا؟ انه نقعد كلنا سوا؟ ولا ماتبين؟"

قبل لا ترد لطيفة قلت: "الا ايه خليهم تكفينا كلنا الطاولة"

كنت ابي اي احد يجي يوسع صدر لطيفة .

كنت انا قاعدة بالنص و على يميني جود و يساري لطيفة .

جو ماشاءلله بنات كثير .

بعضهم يعرفون لطيفة ..

و ماشاءالله يسولفون واجد .

عقب ساعة .

ناظرت لطيفة ساعتها: "انا بروح عندي كلاس بعد عشر دقايق يالله اوصل"

جود: "مع انه ما شبعنا منك والله، ترا حنا كل يوم قاعدين هنا تعالي متى ماتبين"

ابتسمت لطيفة: "ان شاءالله"

اخذت جوالي من الطاولة و قمت مع لطيفة .

تأخرت على بدر عندي دوام اليوم من زمان مخلصة محاضرتي.

وحنا نازلين بالدرج ..

تذكرت بدر قلت ادق عليه .

جوالي كان بأيدي .

فتحته .

الرقم السري غلط .

جربت مره ثانيه .

بعد غلط .

متى انا غيرت الباسورد حقي؟ 

انتبهت للخلفية .

صورة ابوي .

انا متى حطيت صورة ابوي ؟

وقفت لحظات اناظر الجوال .

موب جوالي

نفس لونه وشكله و كل شي 

بس موب جوالي

انا موب حاطة صورة ابوي خلفيه الشاشة.

التفتت عليّ لطيفة: "شفيك وقفتي يلا بتبدا محاضرتي"

"انا نسيت جوالي .. بروح اخذه "

رجعت للبنات .

"اه بنات هذا جوال مين"

نفس البنت الي كانت بجمبي . جود: "اشوف، ويه جوالي هذا" و ضحكت.

اخذت البنت الجوال. 

و تأكدت منه انه جوالها.

ناظرتها: "انتي جود صح؟"

ابتسمت: "ايه؟"

"وش اسم ابوك جود؟"

ابتسمت: "وش الطاري تسألين عن اسم ابوي؟"

"لا لاني مشبه عليك .."

-: "سعود"

حسيت بهوا حاااار بصدري .

ابتسمت و اخذت جوالي من الطاولة و مشيت .

لطيفة: "ها لقيتيه؟"

"طلع جوال جود اللي معي"

لطيفة: "اشوه زين اهم شي لقيتيه"

سكتت شوي لطيفة بعدين استوعبت و ناظرتني.

لطيفة: "وش قالتلك جود؟"

"ابد.. سألتها عن اسم ابوها" و ابتسمت.

لطيفة: "و وش قالت؟"

"كنتي تدرين صح؟"

لطيفة: "والله كنت ابي اقولك .. بس خفت"

"خفتي من وشو"

لطيفة: "خفت احرجك .. خفت انتي اصلاً تكونين تدرين بس ماتبين احد يحاكيك بهالموضوع .."

"لطيفة سألتيني مليون مره عنها! و حلفت لك اني ماعرفها!"

لطيفة: "والله كنت بقولك بس خفت اخرب علاقتك مع ابوك.."

"يعني هذي اختي الحين ..؟ طيب هي عندها خوات؟"

لطيفة: "لا هي وحيدة امها و ابوها"

ابتسمت: "امها؟ وش اسم امها؟"

لطيفة: "ماعرف والله وش اسمها .."

"انتي من متى تعرفينها؟"

لطيفة: "كانت معي بالمدرسة والحين معي بالجامعة"

"كم عمرها"

لطيفة: "اصغر مني بسنتين"

"سنتين؟ شلون اختي؟ يعني هذي اكبر من مشاعل و مها؟"

 تركت لطيفة و طلعت من الجامعة.

بالطريق ..

انا قلت اني بتحمل مسؤولية أهلي .. 

بس ماقصدت كذا، ماقصدت اشياء كبيره كذا ..

اتحمل مسؤولية مشاعل لما تتأخر بالليل و اهاوشها،

اتحمل مسؤولية مها لما تمرض اروح معها المستشفى..

اتحمل مسؤولية اكلهم شربهم .. 

اتحمل مسؤولية ابوي و اخدمه ..

بس موب كذا

موب اعرف انه متزوج و عنده بنت.

سفرات ابوي كلها وضعها غريب 

مابعمري شكيت انه ممكن يكون ما يسافر.

مايجهز شنطته لما يروح، بس ياخذ ثوب ثوبين .

يرجع و الاثواب نظيفة مغسلينها و مبخرينها،

يرجع هو نفسه نظيف متحمم و رايق،

يرجع من السفر و يقعد شوي و يروح الشغل،

هذا مو واحد راجع من سفر،

كلنا نسافر ولا عمرنا رجعنا كذا،

ماعرف وش اسوي 

ابوي مو صغير علشان احاسبه 

ابوي وشلون بقوله ليش سويت كذا 

خواتي وشلون بقولهم ان ابونا متزوج

وشلون بقولهم عندكم اخت اكبر منكم

وصلت الشركة.

رحت مكتب بدر. 

طقيت الباب و دخلت.

كان عنده واحد .

"اسفه مادريت ان عندك احد"

بدر: "لا لا مايخالف اخت مضاوي الحين بيروح هو اصلاً"

طلع الرجال.

و سكر الباب .

قام بدر من مكتبه.

بدر: "خير وش عنده الحلو"

"بدر ابوي طلع متزوج و عنده بنت بعمري"

بدر: "شلون؟ شلون عرفتي"

"البنت معي بالجامعة، اليوم دريت"

بدر: "لا حول ولا قوه الا بالله، مايخالف انتي اقعدي وراك ترجفين"

قعدت على الكرسي .

حطيت ايدي على وجهي .

بدر: "يابنت الحلال والله طبيعي يعني لا تلومينه الرجال زوجته توفت طبيعي يتزوج غيرها"

"مو سالفة انه تزوج، والله لو يبي يتزوج انا ازوجه بعد .. بدر ابوي ماتزوج علشان امي توفت، اقولك البنت بعمري يعني و هو مع امي تزوج و جاب هالبنت!"

بدر: "ماتدرين وش ظروفهم يمكن صار شي"

"مادري وش اسوي.. مادري اقول لخواتي وابوي .. ولا بس اقول لخواتي و نسوي اننا ماندري، هذا اذا وافقوا .. ولا اسوي اني ماعرفت شي و اسكت .."

بدر: "انا اقول سوي انك ماعرفتي شي اريح لك و لهم"

"بس لو قلت لابوي و خواتي و قلتله يجيبهم البيت بنرتاح كلنا، يعني بيصير ابوي ما يغيب كم يوم عن البيت .. يصير معنا و معهم بنفس الوقت"

بدر: "بتخلين مرت ابوك تعيش عندكم بالبيت؟"

"ايه وش اسوي هم بعد اهله و عنده بنت .. يعني اذا كل واحد ببيت يا هم بينحرمون منه يا حنا .."

بدر: "حبيبتي مضاوي.. انا اقول فكري زين، لا تقررين الحين ما وراك شي .. خذي وقت فكري بعدين قرري وش تسوين"

"ان شاءلله.. مادري امي كانت تدري ولا لا .. يمكن هو السبب اللي توفت علشانه.."

بدر: "شدعوه يابنت الحلال، وش سوا هو ترا تزوج، الشرع حلل له اربع شفيك"

سكت.

بدر: "يعني انا عادي اذا تزوجتك اطق فوقك ثلاث"

ضحكت، ضحكني وانا بعز ضيقتي: "اذبحك علشان"

بدر: "ايه كذا نشوف هالوجه الحلو، شرايك نروح نتغدا؟"

"لا انا جاية اقولك انه لو يصير استأذن اليوم .."

بدر: "و ليش ان شاءالله تستأذنين"

"ما احسني بعد اللي عرفته اقدر اشتغل.."

بدر: "مع انه مره مقصره في شغلك هاليومين"

"ليه مقصره وش سويت؟ وش شغلي اصلاً انت تعطيني ايد خربانه على قولتك .. و سمر تسوي نفس الشي، تخليني اسوي اشياء بس علشان اضيع وقتي"

بدر: "قلتلك اخليك تصبين قهوه ماسمعتي كلامي،"

ابتسمت.

بدر: "طيب يلا تعالي انا اوصلك"

"لا بدر بيقولون جت و خلته يوصلها"

بدر: "طيب تعالي بقولهم عندنا اجتماع"

"ليه"

بدر: "علشان مابيك تستأذنين، مضاوي متطوعة يعني مايصير تتغيبين عن الدوام كذا،تعالي و جيبي معك الملفين اللي على الكرسي"

"ليش"

بدر: "جيبيهم و تعالي"

رحنا عند سمر.

بدر: "اه سمر انا و الاستاذة مضاوي رايحين غدا عمل، اجتماع يعني "

استغربت سمر: "اجتماع؟"

بدر: "ايه نسيتي؟" و قام يغمز لها بعيونه. 

سمر: "اه ايه ايه صح الله يهديك استاذ وينك صارلهم ساعة يحاكوني يقولون انهم ينتظرونك من زمان .. يلا لا تتأخرون انا بعد لاحقتكم بعد شوي"

طلعنا .

"يازينها سمر"

بدر: "مره حبيبة"

"ليش ما تزوجها؟"

بدر: "ازوجها؟"

"ايه مره كيوت"

بدر: "ازوجها عشانها مره كيوت؟ بعدين خطابة قالولك؟"

ضحكت: "لا يعني حليلة هي شوفلها واحد تعرفه"

بدر: "ازوجها علشانها حليلة ولا علشان تخافين عليّ منها"

"لا لاتخاف ادري انها زي اختك"

بدر: "زي اختي؟ من قال؟"

"هي قالت"

بدر: "افا، تمشي و تقول للناس كذا؟"

"لا ماقالت كذا بالضبط، حكت لي قصتها و كيف انت وقفت معها"

غير جوي بدر .

كنت متنكده .

احسني شايله هم الدنيا كلها.

بس بدر سهل الموضوع عليّ.. 

خلاني احسه عادي .

وصلني بيتنا.

"شكراً بدر"

بدر: "العفو، ابيك تنسين الموضوع و تريحين راسك، ارتاحي كم يوم بعدين فكري بالموضوع"

"ان شاءالله"

بدر: "يلا ديري بالك على نفسك"

"ان شاءلله، مع السلامة"

.

دخلت البيت .

مشاعل ومها كانو قاعدين يتغدون .

قعدت معهم .

مشاعل كانت تسولف وانا سرحانه .

استوعبت ان مكان ابوي فيه صحن!

"هذا من ماكله!"

مها: "ابوي"

"ابوي جا!"

مشاعل: "ايه جا و تغدا معنا و راح غرفته"

"ليش ماقلتولي!"

مشاعل: "مدري توك جاية ما امدانا نقولك شي"

"متى جا الساعة كم"

مشاعل: "ثلاثة يمكن"

تنهدت.

شوي ولا نزل ابوي .

اول مره احسني ما اناظر ابوي 

اناظر شخص ثاني 

شخص ماعرفه .

همست لي مها: "قومي سلمي عليه"

قمت حبيت راسه: "الحمدلله على السلامة يبا"

ابوي: "الله يسلمك، وين كنتي"

كان يعدل غترته بالمرايه و يكلمني .

"كنت بالدوام، شلون سفرتك؟"

ابوي: "الحمدلله حلوه"

"طالع؟"

ابوي: "ايه طالع، وش تبين اجيب لك معي"

"لا حبيبي ابي سلامتك، بس كنت بكلمك بموضوع"

ابوي: "خير وش موضوعه؟"

"خلاص اذا رجعت.."

ابوي: "لا قوليه الحين مايخالف"

"اليوم بالجامعة .. شفت جود"

ابوي: "شفتي مين؟"

"جود .. بنتك."

ناظرني .

"امي كانت تدري؟"

ابوي: "هي جت حاكتك جود!؟"

"لا هي ماتعرفني .. "

سكت.

"يبا امي كانت تدري؟"

ابوي: "انا طالع اذا رجعنا نحكي بالموضوع"

و راح و هو معصب .

رقيت غرفتي .

جتني مشاعل.

مشاعل: "شفيكم وش قلتي له"

"وين مها"

مشاعل: "تحت"

"ناديها و تعالو بقولكم شي"

مشاعل: "شي وشو"

"ناديها و اقولك بسرعة!"

...

..

.

قررت من اليوم ورايح اصير لطيفة جديدة .

لطيفة قوية

اغير نظرتهم فيني 

مابي اي احد يرحمني و يقول مسكينه 

ابي الكل يقول وقفت على رجلينها و كملت .

و ببدا من الجامعة .

غياباتي واجد .

معد ابغيب و بسوي كل شي مطلوب منّي.

اول شي التدريب اللي قالت عنه مضاوي .

اللي بستاربكس .

بروح لهم اتفاهم معهم و اعرف متى ابدى.

تحممت و بدلت و رحتلهم .

دخلت،

جاني البايخ ذاك. 

"اهلن لطيفة وينك من زمان عنك"

"وين المدير الله يعافيك"

"خير صاير شي؟"

"ابي المدير، بحاكيه عن شغلي"

"هو موب موجود الحين، عقب ساعة يمكن يجي، تفضلي اشربي شي على ما يجي"

"طيب عادي تعطيني رقمه احاكيه انا"

"رقمه؟ ايه اكتبي عندك ****"

سجلت الرقم و طلعت .

بالطريق .

دق جوالي 

سعد

حطيته سايلنت .

اتصل كم مره مارديت .

وقفت بالأشارة .

جا سعد طق شباكي .

ارتعت .

فتحت الشباك: "سعد وخر بحاكي الشرطة ترا"

سعد: "ردي عليّ"

"مانيب رادة"

راح وقف قدام السيارة .

"وخر!"

واقف و مكتف ايدينه .

حطيت ايدي على وجهي .

فتحت الاشارة.

و الناس تزمر لي من وراي .

و كل احد يمر من جمبي يناظرني .

قلت لسعد بايدي انه تعال

فتحت الشباك.

"برد عليك خلاص روح"

سعد: "الحين تسفطين يمين بحاكيك"

"برد عليك مايحتاج"

سعد: "لو سمحتي؟"

تنهدت.

و سكرت الشباك

رحت وقفت اسمع وش يبي .

"نعم خير شعندك"

سعد: "لطيفه اسمعيني للآخر"

"ايه قاعدة اسمع تكلم!"

سعد: "لطيفه انا احبك، معاك حق تزعلين مني بس لاتحرميني منك، هاوشيني بس لا تسفهيني وماتردين عليّ"

"وانا اكرهك، وما اتحمل اشوفك"

سعد: "انتي ماتعرفيني علشان تكرهيني، انتي تعرفين سعد اللي كان يكذب .. ماتعرفين سعد اللي يحبك"

"ايه ماعرفك و اكرهك زين كذا؟"

سعد: "ماعطيتيني فرصة اعرفك على سعد الصدقي"

"مابي اتعرف على احد شكراً"

سعد: "ريم لما كانت تغلط كنتي تسوين كذا؟"

"مالك شغل بريم"

سعد: "الا لي شغل، انتي قلتي انا نفس ريم"

"لا تحكي عن ريم قلتلك"

سعد: "لطيفة اترجاك، عطيني فرصة ثانيه"

"ما تستاهل اعطيك ولا شي"

سعد: "ابوس ايدك عطيني فرصة"

"ما ابيك سعد مو غصب!"

سعد: "علشان خاطر ريم.."

"مالك شغل بريم قلتلك"

سعد: " ماوصتك عليّ؟"

"مالك شغل"

سعد: "عازمك على سوشي طيب"

مارديت.

سعد: "ولا شرايك اوديك تويز ار اس!"

مارديت.

سعد: "لطيفه"

"نعم"

سعد: "احبك"

"سعد عن حركات المبزره، الحين موقفني بالشارع تقول لي كذا!!"

سعد: "وشو مو مهم بنظرك؟"

"لا مو مهم!! انت بكبرك مو مهم! ولاتفكر اني ممكن احبك!"

سعد: "بس لطيفة"

"ولا عاد تعيد حركات الاشارة هذي ولا تلاحقني من الاساس لان صدق بحاكي الهيئة"

سكت .

"خلصت اللي عندك؟ ممكن امشي الحين!"

سعد: "خلصت ."

ركبت سيارتي و مشيت .

سعد ماعاد اتصل فيني .

ان شاءلله يكون استوعب . 

ما انكر اني فيه شي زعلان عليه بداخلي ..

زعلان و وده يسمع وده يسامح..

و فيه اشياء كثيره زعلانه منه ولا تبي تسامحه .. 

كنت "ادرس" و هذا شي كنت ما اسويه بالفترة الاخيره .

و جا في بالي حق ستاربكس .

ناظرت الساعة كانت ٧ المغرب .

وقت مناسب اني اتصل .

دورت الرقم اللي سجلته اليوم الصبح .

و اتصلت.

- .. 

- .. 

- .. 

-الو

-الو السلام عليكم 

-وعليكم السلام هلا لطيفة

-اوه عرفتني؟ 

-ايه شدعوه شلون ماعرفك

-انا اللي قبل فترة قلتلك ابي اشتغل عندكم

-لا هذاك المدير، 

-انت موب المدير؟

-لا انا عبدالله

-عبدالله مين؟

-عبدالله اللي شفتيني اليوم

-اللي طلبت منه رقم المدير؟

-ايه هذا 

-و ماعطيتني رقم المدير. عطيتني رقمك.

-ايه عطيتك اياه علشان تدقين و اعطيك رقم المدير عرفتي؟

-ايه طيب عطني اياه

-الحين ارسلك اياه واتساب 

-لا ترسل شي واتساب عطني الرقم الحين اسجله قولي اياه

- ارسلك اياه اسهل

-قاعدة اقولك قولي الرقم الحين لو سمحت

-اللي تبينه، هذا الرقم *****

-سجلته، على الله يكون رقمه صدق هالمره، 

-لا لا رقمه

-طيب شكراً يعطيك العافية

-شدعوه هذا واجبنا، اه بتسكرين؟

-ايه بسكر؟ خير تبي شي؟

-لا بس قلت نسولف، وش تسوين

-اخوي لو سمحت لا تخليني اعلم مديرك .. ولا تاخذ وجه بزيادة طيب؟

-بس قلت نسولف 

-ايه وانا اسولف معك هاو! الحين ابيك تمسح رقمي، و احترم نفسك مره ثانيه عيب عليك الله تسويه!

و سكرت .

وع . وعوعوع.

وش تسوين اجل؟ بزعمه يبي يفتح سالفة .

ما اتصلت على المدير حوّم كبدي هذا .

كملت دراسة و قلت بكره الصبح اكلم المدير .

...

..

.

مشاعل: "وش كبرها بنته!!"

"اصغر مني بسنتين .. عشرين يمكن"

مشاعل: "شلون طيب! شلون يكذب علينا!"

مها: "ما يكذب بس يمكن ما يبي يضايقنا .."

مشاعل: "وش يضايقنا الرجال ما همه حنا صارله عشرين سنه مغبي الموضوع!"

مها: "طيب امي كانت تدري؟"

"مادري.."

مها: "ما اظنها تدري ماقد حكي عن الموضوع"

مشاعل: "حسبي الله وشفيها امي علشان يتزوج عليها!"

مها: "لا تتحسبين مشاعل! ابوك تراه!"

مشاعل: "مضاوي انتي شلون دريتي بالضبط يعني هي جت قالتلك؟"

"لا تذكرون لما قلتلكم فيه وحدة نفس اسم عايلتنا معي بالجامعة؟ شفتها حاطه صورته بالجوال .. و سألتها وش اسم ابوك"

مشاعل: "وينك يا يمه تشوفين وش صاير وينك"

مها: "مضاوي طيب وش بنسوي؟ يعني ابوي اكيد بيرجع معصب "

"علشان كذا قلتلكم .. ابي اقولكم وش ودي اسوي انا .. وانتو كيفكم، اذا تبونها سويناها اذا ما تبونها خلاص "

مشاعل: "وشي؟"

"اننا نقول لأبوي يجيبهم هنا يعيشون معنا .. "

مشاعل: "تخسي!! ماتدخل البيت هذا مراه غير امي!"

"مشاعل فكري فيها والله هذا ازين حل لنا كلنا، حنا و ابوي و هم بعد"

مها: "وش دراك انهم بيوافقون؟ يعني اكيد عندهم بيت، عشرين سنه وين قاعدين"

"نجرب حنا و نشوف"

مشاعل: "لا مانبي نجرب! انا مو موافقة!"

"اذا ماتبون كيفكم .. "

مها: "انا مع مضاوي، انه نقولهم يجون هنا"

مشاعل: "لأنك بقره!!"

"اششش مشاعل قاعدين نتفاهم موب نتهاوش"

مشاعل: "انتي بعد وش اللي نجيبهم هنا خبله انتي؟ ماتسمعين عن سوالف مرت الابو؟ ماتسمعين وش يسوون؟"

"اسمع بس عندك حل غيره؟"

مشاعل: "نقول لابوي، يختار يا حنا يا هم "

"حرام مشاعل زي ما حنا بناته هناك بنته"

مشاعل: "ترضين يعني وحدة غريبة تجي تنام بسرير أمي مع أبوي ؟"

-" مشاعل!! "

فزينا ثلاثتنا من الصوت .