Chapter ٣٦

-يوم التخرج-

"صباح الخير"

سعد: "لطيفة؟ هلا صباح النور"

"شفيك مستغرب؟"

سعد: "لا بس جاية شغلي اول مره"

ابتسمت: "ايه كنت مارّه من هنا و قلت اعطيك التذاكر"

سعد: "تذاكر وشو؟"

"حفل التخرج شفيك نسيت؟"

سعد: "ايه صح صح"

"الزبدة هذا حقك و هذا حق الدكتورة منال، اذا شافوك امي و ابوي قول انك تصيرلها او شي طيب؟"

سعد: "طيب هي قلتيلها؟ انه عزمتيها؟"

"ايه حاكيتها لاتخاف، و قلتلها بحطهم عندهم، "

سعد: "خلاص زين، تفضلي وش تشربين طيب"

"لا شكراً والله مستعجلة، مره ثانية"

سعد: "اول مره تجين شغلي و ماتشربين شي؟"

"ايه مره ثانيه خلها بليز، لا تتأخر اليوم طيب؟"

سعد: "ان شاءالله حاضر"

طلعت و حاكيت مضاوي .

-الو

-نايمه؟

-ايه

-صرنا ظهر ترا

-مانمت زين امس كان عندي اختبار

-متى بتسوين شعرك و تجهزين ما يمديك

-الا يمدي يمدي بس روحي خليني انام

-طيب كيفك.. حاكيني اذا قمتي .

و سكرت .

اليوم بتخرج من الجامعة .

صدق اكثر شي اتمناه تكون ريم معي ..

كانت تحلم بهاليوم

كله تحكي عن التخرج ..

كانت تنتظر لحظة التخرج تعد الايام..

ماكنت تدري انها بعمرها مارح تعيشها ..

الله يعوضك بالجنّة يارب ..

...

..

.

-مضاوي-

الساعة  ٩:٣٠ 

-بالسيارة-

مشاعل: "مايصير نحاكي ابوي ناخذ جود معنا؟"

مها عقدت حواجبها: "و من متى الحب ماشاءالله؟"

مشاعل: "موب حب بس حرام"

مها: "من متى ترحمينها؟"

مشاعل: "مدري ضيقت صدري .. يعني تراها صادقة مو ذنبها .. تخيلي تنولدين و هذي امك؟ ماتقدرين تسوين شي"

مها: "صدق مره حرام .."

مشاعل: "مضاوي"

"...."

مشاعل: "ويين الخريجات سرحانين"

"....."

مشاعل: "مضاوي!!"

"ها نعم؟"

مشاعل: "ها نعم؟ صارلي ساعة انادي!"

"شتبين؟"

مشاعل: "حاكي ابوي يخلي جود تجي معنا"

"احاكي ابوي؟ على اساس يسمع مني؟"

مشاعل: "ماحكى معك من ذاك اليوم؟"

" ولا ناظرني و كل ماجيت مكان يقوم، كأني انا الغلطانه"

مشاعل: "ماعليك منهم الله بياخذ حقك .. "

"جود اصلاً قالت ما ودها تروح سألتها امس"

مها: "مضاوي شوفي صح هنا الجامعة؟ الظاهر مضيع السواق"

"لا يدلها كل يوم يوصل جود"

مها: "مو متأخرين حنا؟"

"الا بس بقى ساعة لسا "

مها: "اشوه زين"

مشاعل: "ايه قالت وعد لسا"

مها: "وعد؟"

مشاعل: "ايه وعد؟"

مها: "وش دخلها؟ لاتقولين جاية بعد؟"

مشاعل: "ايه جاية شتبين؟"

مها: "وش جابها"

مشاعل: "بنت خالها متخرجة بعد، انتي وش عليك؟"

مها: "استغفرالله بكل مكان تطلع لنا"

مشاعل: "وش عليك منها جامعة ابوك هي؟"

مها: "ايه جامعة ابوي"

"خلاص!! صدق غلطانه جبتكم معي!"

مشاعل: "شفيك ماقلنا شي بس اختك تت-"

"خلاص مشاعل ماقلتلك قولي وش صار!"

وصلنا الجامعة .

قعدو خواتي بمقاعدهم .

"انا بروح اشوف لطيفة و اجيكم"

مشاعل: "اوكي بحاكي ابوي انا لانه قال بيجي"

تركتهم و حاكيت لطيفة و رحت لها .

سلمت على أمها و أبوها .

"تعالي ابيك شوي"

لطيفة: "وشفيك؟ شكلك يجنن صدق اول مره اشوفك بميكب كذا! مره حلو عليك!"

ابتسمت: "شكراً انتي بعد .."

لطيفة: "ايه؟ وشفيك؟"

"بدر .."

لطيفة: "وشفيه؟"

"مب قاعد يرد عليّ من الصبح.. قالي انه بيجي اليوم و ما اتصل ولا سأل ولا شي"

لطيفة: "طيب اهدي انتي شوي مايسوى عليك اليوم تخرجك.. يمكن طلعت له سالفة و انشغل"

"لا مايسويها.. اخاف صار فيه شي .."

لطيفة: "لا ان شاءالله موب صاير شي"

"لطيفة ما يرد بيكمل ١٢ ساعة! و اتصلت على مكتبه قالتلي ما داوم اليوم"

لطيفة: "طيب اهدي شوي يابنت الحلال علشان نعرف شلون نتصرف، شوفي ايدينك شلون ترجف اهدي شوي .."

"ماقدر اقعد ولا دقيقة بروح ادوره .."

لطيفة: "تروحين وين تدورينه تستهبلين؟ بعد نص ساعة المسيرة"

"ادوره بأي مكان ما ادري!"

لطيفة: "طيب اصبري موب انتي تروحين مايصير .."

"من يروح؟ محد يعرف عن بدر الا انا وانتي و كلنا هنا مين يروح؟"

لطيفة: "سعد هنا.. تبين اقوله؟"

"لا.. هو جاي يشوفك عيب ارسله يدور بدر.. "

لطيفة: "مايخالف نخليه يساعدنا"

"لا لا صدق لاتقولين له.."

لطيفة: "بتروحين انتي يعني؟"

"وش اسوي ماعندي حل ثاني"

لطيفة: "طيب اجي معك بس انتظري عقب المسيره؟ بليز؟"

"ماقدر.."

لطيفة: "لو سمحتي علشاني؟ و نخلي سعد يساعدنا بعد يحاكيهم يشوف الحوادث اذا فيه اسمه المستشفيات كذا.."

"حوادث؟"

لطيفة: "بسم الله عليه يعني بس نتأكد.."

"طيب .. ننتظر.."

-مشاعل و مها- 

مشاعل: "ياجماعة ماشوف مضاوي ؟"

مها: "كل البنات يشبهون بعض ماشوفها"

مشاعل: "وينها هاو"

مها: "يبه تشوف مضاوي؟"

ابوي: "لا والله ماشفتها"

مشاعل: "تستهبل وين راحت اختك؟"

مها: "هذاي قاعدة ادق عليها، ...  مشغول "

مشاعل: "مشغول؟ تستهبل من تحاكي الحين وقته يعني"

-مضاوي-

قبل ننزل المسرح مع البنات .

دق جوالي 

رقم غريب .

#- الو

#- هلا مضاوي، الف مبروك والله توني اسمع انه تخرجك

#- الله يبارك فيك؟ مين معي؟

#- شدعوه ناسيه صوتي، صقر انا

#- وين بدر؟ معك صح؟ 

#- ايه توني دريت منه انه تخرجك، عاد زعلت عليه ليه موب قايل لي من بدري كنت ارسلت لك احلى هدية

#- وينه

#- مين؟

#- وين بدر!

#- توه مسافر و قالي اتصل اعتذرلك 

#- مسافر؟

#- ايه ليش ما قالك؟

#- مسافر وين

#- هاو ما قال لك؟ موب على اساس تحبون بعض؟

#- جواله موب مسكر

#- ايه شوي يسكره لاتخافين، انتي استانسي بتخرجك و الف مبروك مره ثانية

#- انت اللي قايل له يسافر صح؟

#- قايل له يلعب انا؟ شغل ياحبيبتي هذا موب لعب مراهقين

#- انت وش تبي بالضبط! شركتك وطلعت منها وشتبي مني

#- قلتلك وش ابي منك، قلتلك وخري عن بدر وماوخرتي

#- وش دخلك فيه انت! ابوه وانا مادري! مو كافي انك قاعد تخليه يشتغل عندك غصباً عليه!

#- لا لا موب زين تعصبين كذا بيوم تخرجك ياحلوه .. روحي استانسي و سلميلي على بدر ها.. يلا مع السلامة

و سكر .

مانزلت مع البنات .

لطيفة: "مضاوي!"

ناظرتها و نقطة واصيح.

لطيفة: "وش صار؟"

"اتصل عليّ صديقه"

لطيفة: "اي-ايه؟ وش قال؟ صار شي؟"

"سافر"

لطيفة: "سافر؟ طيب زيين يابنت الحلال"

"ايه. تخيلي بهالبساطة. وانا بموت خوف من الصبح و الأخ مسافر"

لطيفة: "هو قالك انه جاي؟"

"ايه قلتله و قالي بجي!"

لطيفة: "يمكن ملخبط باليوم"

"قلتله الخميس"

لطيفة: "يمكن ..."

"يمكن ما يبي يجي . لاتقعدين تطلعين له اعذار موب هامه.."

لطيفة: "طيب مايخالف اهم شي انه بخير وماصار فيه شي وش تبين اكثر من كذا"

"والله لو صار فيه شي اهون عليّ، على الأقل موب قاصد .. موب قاصد انه مايجي"

لطيفة: "استغفرالله حرام"

"لطيفة انتي ماتعرفين هذي المره الكم، ماتعرفين وش كثر بدر يحسسني اني شي ماله معنى .. لطيفة بدر لعب بنفسيتي خلاني ما اثق بنفسي! مهما سوا كنت اقول مايخالف مايقصد، يمزح، شخصيته كذا ، بس خلاص صدق! "

لطيفة: "قصري صوتك طيب لحد يسمعك، الحين اذكري الله و انزلي اهلك كلهم تحت حرام ينتظرونك وماتجين.. انزلي و عقبه نتفاهم "

نزلت مع لطيفة و بالي مو معهم ابد .

بدر ليش يقول لصقر ان تخرجي اليوم؟

بدر اصلاً ليش يحكي مع صقر عنّي ؟

خلصت الزفة .

رحت لخواتي .

لمتني مشاعل: "كيوووت مبروك ما اصدق تخرجتي"

"ابوي جا؟"

مشاعل: "ايه جايين وراي هذاهم هو و مها، "

"طيب زين يلا نمشي؟"

مشاعل: "نمشي؟ خلاص المفروض خلصت الحفلة؟"

"ايه"

جا ابوي .

حبيت راسه .

ابوي: "الف مبروك يا بابا هذي هديتك"

"شكرا.."

مها: "و هذي حقتي انا" و لمتني .

مشاعل: "انا هديتي بالبيت"

"شكرا، خلاص نمشي؟"

مشاعل: "وشفيك؟ ليش تمشين الحين؟"

"ماتشوفين؟ زحمة وش نسوي نقعد"

وانا اكلم مشاعل شفت بدر وراها .

توه داخل من الباب .

شافني وقرب بس وقف يوم شاف اهلي .

لا مره جاي بدري .

"مانيب قاعدة ولا دقيقة تبين تقعدين ارجعي مع وعد"

التفتت مشاعل وراها تشوف وش كنت اناظر .

مشاعل: "وشو تبين تروحين له او شي؟ روحي اقولهم راحت الحمام عادي"

"مابي اروح لأحد خلصيني بمشي!!"

ناظرت مشاعل مها اللي كانت بعيدة شوي مع ابوي .

مشاعل: "مها، "

مها: "هلا؟"

مشاعل: "ارجعي مع ابوي انا برجع مع مضاوي"

مها: "ارجع معكم طيب "

مشاعل: "لا بنروح مشاوير كثير و ابوي حرام يرجع بلحاله ارجعي معه حنا بنرجع مع السواق"

مها: "مشاوير؟"

مشاعل: "ياربيه ايه مشاوير روحي خلصيني!"

مها: "طيب .. باي "

و راحت مها و ابوي .

"مشاوير وشو؟"

مشاعل: "بدر"

"روحيها بلحالك اجل هالمشاوير!"

و رحت و تركتها .

-مشاعل-

مضاوي: "روحيها بلحالك اجل هالمشاوير!"

وش الي صاير بينهم صدق؟ 

التفت و رحت لبدر .

"انت وش مسوي مصيبة ثانية!!"

بدر: "وينها؟ راحت؟"

"ايه طبعاً راحت! وش مسويلها بعد!!"

بدر: "ماسويت شي، وين راحت؟"

"وش اللي ماسويت شي! اختي موب زعول! قبل يومين كانت زعلانه و رضت ما امداها تزعل مره ثانيه"

بدر: "ايه انا حمار"

"حمار بس؟ الا حمار و ثور بعد!"

بدر: "وين راحت علميني"

"الحين ليش منكد عيشتها المسكينه كل يوم والثاني متهاوشين و مضيق صدرها!"

بدر: "قلتلك انا غلطان علميني وينها اروح احاكيها"

"على اساس بتسمعك؟ ولا انا اللي بعلمك وينها؟"

بدر: "مشاعل اسمعيني"

"انت اللي اسمعني مابعد خلصت كلامي! تبي وحدة تقعد تخربط معاها ناظر حولك القاعة كلها بنات! اذا تبي اختي تحترمها و تقدرها و ماتضيق صدرها!! "

بدر: "انتي الحين بتعلميني شلون احترمها؟"

"ايه انا اللي بعلمك و اعلم عشرة مثلك بعد!"

ضحك ضحكة شماته: "والله الهياط وراثه عندكم بالعايلة الظاهر"

"و الغباء و شوفه النفس وراثه عندكم انتو؟"

بدر: "اسمعيني يا بابا"

"انت اللي بابا منب اصغر عيالك انا، حاكيها و راضيها الحين"

بدر: "ايه شلون احاكيها ميب رادة عليّ لو اموت"

"اجل تبيها ترد عليك؟"

بدر: "شلون اراضيها اجل؟"

"مدري شوف لك حل"

بدر: "عطيني رقمك ادق عليك و تخليني احاكيها"

"هاها نو واي اعيد الحركة هذي"

بدر: "مشاعل بليز. موب علشاني علشانها هي"

"علشانها هي بتذبحني!"

بدر: "انا اقولها اني انا اللي ضغطت عليك"

"ماقدر"

بدر: "يلا مشاعل تكفين"

"واذا هاوشتني؟ ترا تهاوش هواش ما يمزح تروّع"

بدر: "انتي عطيني اياه و انا اقولها لا تهاوش"

"طيب .... انت عطني رقمك ماحب اعطي احد رقمي"

بدر: "وش هالعايلة اللي طحت فيها يارب "

"نعم؟"

بدر: "لا ابد .. بس تتوارثون اشياء غريبة . هذا رقمي بس دقي عليّ الحين علشان ينحفظ عندك موب يدق عليك احد ومايسوي سيڤ"

"مافهمت بس اوكي ، ايه صح اسمع لا تدق ابد انا بدق عليك، و اذا مره بتموت و تدق ارسل مسج قبل، انا وحدة مخطوبة و خطيبي يغار عليّ"

بدر: "ياحبيبتي لو متزوج بدري جبت وحدة كبرك"

"لا يكثر لا تخليني اغير رايي"

بدر: "خلاص الرقم عندك متى ما حسيتيها هدت حاكيني"

"ان شاءلله، "

حاكيت مضاوي و لحقتها على السيارة .

ماكانت تحكي ولا كلمة .

حاطة سماعاتها بأذنها و تناظر من الشباك .

"مضاوي تبين نقوله يوقف نشتري عشا؟"

مضاوي: "لا موب جوعانه"

رجعنا البيت و راحت ركض على غرفتها .

...

..

.

-لطيفة-

عقب التخرج قلت لأمي أني بروح مع الدكتورة منال مطعم .

كانت نص كذبة .

الدكتورة كانت صدق معنا . بس سعد كان بعد موجود .

"ما اصدق اني اخيراً تخرجت! بس بقى كم فاينل و خلاص"

الدكتورة منال: "الحمدلله يارب منها للأعلى ان شاءلله"

"ان شاءلله.. شكراً دكتورة.. لولا الله ثم انتي ما تخرجت الحين"

الدكتورة منال: "وش دعوه ماسويت شي انا .."

"انتي سويتي كل شي .. انتي خليتيني اعيش من جديد بعد ماكنت دافنه نفسي بالحياة"

سعد: "خلاص مانبي نذكر الاشياء القديمة خلنا بالجديد"

سمعت وراي صوت ناس يصارخون.

عقبه استوعبت انه يغنون .

معهم كيكة صغيرة .

جايين لطاولتنا .

حطوها قدامي .

ناظرت سعد 

شلون قاعد يبتسم .

شلون قاعد يناظرني .

حسيت لحظتها ان صدق الله عطاني اكثر من ما استحق .

مابعمري كنت احلم بواحد زي سعد .

صدق سعد كثير عليّ.. 

متأكدة أنه دعوة أمي لي بساعة استجابة حققها الله على هيئة انسان .

احسني مكتفية فيه عن الدنيا كلها .

عطتني الدكتورة منال هديتها و مشت .

سعد: "صار دوري انا صح؟"

"دور وشو؟"

سعد: "هديتي؟"

"كل هذا و لسا فيه هدية؟ ياحظي"

سعد: "هذي منّي و هذي من جوجو"

"جوجو؟ كيوت ليتها جت نسيتها"

سعد: "والله من قلتلها و هي ناشبة الا اجي معك بس قلتلها مافي اطفال"

"ليتك قايل لي والله نسيتها .."

سعد: "طيب يلا افتحيهم"

"افتح اي وحدة قبل؟"

سعد: "اللي تبين"

فتحت هدية جوجو .

باربي .

سعد: "قعدنا ندور اكثر وحدة تشبه لك، "

ضحكت: "هذي انا يعني؟"

سعد: "يعني ايه .. "

"والولد اللي مع الباربي هذا مين؟"

سعد: "تقول جوجو انه انا، بغض النظر عن انه اشقر و مخيس"

ضحكت: "ليتك اشقر!"

سكت .

"امزح والله امزح، ليه ماجبت واحد يشبه لك؟"

سعد: "القمر مافيه منه اثنين"

ضحكت: "بايخة"

سعد: "يلا هديتي افتحيها"

"الله يستر .."

فتحت الهدية .

"خاتم؟"

سعد: "تقدرين تعتبرين هذا الخاتم الرسمي؟"

"من متى حنا نخطب كذا؟" ضحكت .

سعد: "قلت لأختي، و قالت بس اعلمها اليوم و تجيكم"

ابتسمت .

سعد: "للحين تبيني لطيفة؟"

"وش هالسؤال؟"

سعد: "ابسألك اياه لين اسمع اجابة صدق طالعة من قلبك"

"يعني كل اللي جاوبتهم موب طالعين من قلبي؟"

سعد: "تبين الصدق؟ لا .. ما احسهم طالعين من قلبك.."

"سعد انا احبك .."

سعد: "ماسألت تحبيني .. سألت تبيني؟ تتزوجيني؟"

"اكيد ابيك"

سعد: "تبيني زوج لك؟"

"ايه ابيك زوج لي؟"

سعد: "تبيني بحالتي الصحية هذي؟"

"قلتلك سعد .. بمرضك بصحتك ابيك .."

سعد: "بظل اسأل .. "

"سعد انت تنتظر اجابة معينه يعني؟ غير اللي اقولهم؟"

سعد: "لا حبيبتي"

"الا، تنتظرني اقولك لا ؟ وشفيك؟ انت تبيني طيب؟"

سعد: "اصير حمار اذا قلت مابيك .. انا بأجمل احلامي ماحلمت اني احب وحدة مثلك .. "

ابتسمت .

سعد: "طيب ارسلي لي رقم امك علشان تحاكيها اختي و يتفقون على يوم"

...

..

.

-مشاعل -

عقب يومين.

قمت من النوم .

دخلت الحمام اغسل وجهي .

و طلعت لقيت مها واقفة قدامي و مكتفة ايدينها .

"خير ان شاءالله؟ العمة جت؟"

مها: "مين بدر"

"بدر؟ مين بدر؟"

مها: "مشاعل لا تستغبين.. مين بدر اللي تحاكينه؟ ما تبتي من هالسوالف؟"

"انتي بأي حق تمسكين جوالي؟"

مها: "نتفاهم على هذي بعدين، مين بدر؟"

"مو شغلك"

مها: "مشاعل تراك مخطوبة الحين حرام عليك"

"وش دخل مخطوبة!"

مها: "بدر هذا لا يكون سلطان بس مغيره الاسم؟"

"لا طبعاً! سلطان ماحاكيته من هذيك السالفة!"

مها: "يعني هذا واحد جديد؟"

"موب واحد جديد محد!!"

مها: "اوكي مارح تقولين بعلم مضاوي"

"لا مضاوي لا"

مها: "بعلمها لو ماحكيتي، اللي قاعدة تسوينه غلط"

"مها انتي موب فاهمه بدر موب اللي ببالك والله"

مها: "اجل وشو؟ واحد داق عليك اربع مرات و كلها الفجر! و مرسل لك مسجز (دقي عليّ، حاكيني، وينك فيه، يلا وينك!) هذا وشو وش افهم من كذا!"

"بقولك بس بعدين .."

مها: "انا رايحة اقول لمضاوي انا اسفة"

مسكتها مع كتفها: "تعالي اصبري، مايصير مضاوي بالذات مايصير"

مها: "ليش"

"لان بدر هذا سالفته مع مضاوي موب معي"

مها: "شلون؟"

"بدر هذا اللي كان مدير مضاوي "

مها: "تحب واحد متزوج!؟"

"قصري صوتك وجع، موب متزوج انا ألفت السالفة هذي ولا هو موب متزوج و يحبون بعض و عطاني رقمه يوم الحفلة علشان ......".

و حكيت لها كل شي.

...

..

.

-مضاوي- 

كنت نازلة اسوي لي فطور .

وانا طالعة من غرفتي لقيت خالتي واقفة عند باب غرفة مها و مشاعل و حاطة اذنها على الباب .

"خالتي"

فزت من مكانها .

"ليش واقفة هنا؟"

خالتي: "ق-قلت انادي البنات لو يبون يفطرون.."

"و تنادينهم انتي بنفسك؟ و كذا توقفين؟"

خالتي: "كنت ابي اعرف نايمين ولا لا.."

"و عرفتي؟"

خالتي: "ايه شكلهم لان ما سمعت شي"

"بس وقفتك هذي ماتقول انك ماسمعتي شي"

خالتي: "تبين فطور انزلي تحت!" و سفهتني و مشت.

دخلت على البنات الغرفة.

"وش كنتوا تقولون؟"

مشاعل: "ولا شي ماكنا نقول شي"

"اشوه زين، لان خالتي كانت واقفة عند الباب صارلها شوي، زين انكم ماكنتوا تقولون شي عنها"

مشاعل: "واقفة ويين؟"

"عند الباب هنا تو شفتها"

مها: "كان قلتيلنا!"

"وش اصارخ اقول اسكتو؟ مو قلتو ماكنتو تقولون شي؟ خلاص زين .. ديروا بالكم مره ثانيه .. الزبدة تعالو نفطر الظاهر فيه فطور تحت .."

و طلعت من الغرفة .

...